Ávarp Gyðu á stofnfundi Femínistafélags Íslands 14. mars 2003

Komið þið sæl.
Ég heiti Gyða og ég er FEMÍNISTI. Það er ekki sjúklegt ástand og því engin hætta á að lækning finnist eða hægt sé að ávísa lyfjum til okkar.

Mig langar að segja ykkur frá draumi sem mig dreymdi.
Mig dreymdi Konu. Kona vinnur hjá fyrirtæki. Kona komst að því, fyrir eina af þessum lífsins tilviljunum, að laun hennar voru 15% (prósentum) lægri en laun Karls í sambærilegu starfi hjá sama fyrirtæki. Kona talaði við Vinnuveitanda sinn. Vinnuveitandi lét ekki segjast, þóttist ekki kannast við málið. Vinnuveitandi trúir því að karlar séu fyrirvinnur. Kona hafði samband við Launahóp FEMÍNISTAFÉLAGSINS. Þau mættu á svæðið og töluðu við Vinnuveitanda. Vinnuveitandi stóðst ekki hin sterku og góðu rök FEMÍNISTANNA. Vinnuveitandi á sjálfur tvær dætur og er orðinn dauðþreyttur á fyrirvinnuhlutverkinu.
Kona fékk launaleiðréttingu sjö heilög ár aftur í tímann.

Mig dreymdi Veru. Veru var boðið út að borða og í leikhús af Kunningja sínum. Kunningi bauð Veru síðan í kaffi heim til sín þar sem hann nauðgaði Veru. Vera fór upp á bráðamótttöku í leigubíl, öll rifin og tætt. Þar hringdi hún í Ofbeldisvarnarhóp FEMÍNISTAFÉLAGSINS. Þau fóru saman heim til Kunningja og límdu miða á bílrúðurnar á bíl Kunningjans. Á miðunum stóð: „SVONA GERIR MAÐUR EKKI“. Kunningi átti í mestu vandræðum með að ná miðunum af; þurfti að þola illt auga nágrannanna; á meðan hann skrapaði og skrapaði. Kunningi þurfti einnig að útskýra seinkun sína í vinnuna. Þau biðu líka nokkur úr Ofbeldisvarnarhópi FEMÍNISTAFÉLAGSINS fyrir utan vinnustaðinn eftir að vinnutíma lauk. Kunningi komst ekki hjá því að sjá þau. Þau sögðu ekkert, horfðu bara á hann og hann vissi að þau vissu. FEMÍNISTARNIR voru viss um að skömmin og niðurlægingin hefði fundið sinn heimastað.
Vera sat eftir með reiðina sem hún nýtti sér á uppbyggilegan hátt. Vera gekk til liðs við Ofbeldisvarnarhóp FEMÍNISTAFÉLAGSINS.

Mig dreymdi Freyju. Freyja settist inn á bar og pantaði sér drykk. Við hlið Freyju settist Ferðamaður. Ferðamaður spyr Freyju hvort Ísland hafi ekki átt fyrsta lýðræðisiskjörna kvenkyns forseta í heiminum. Freyja játar því með stolti í röddinni. Ferðamaður spyr hvort Freyja sé ekki til í tuskið. Freyja biður Ferðamann að láta sig í friði. Ferðamaður lætur sér ekki segjast, heldur áfram að áreita Freyju kynferðislega.. Enda uppfullur af hugmyndum um meint lauslæti íslenskra kvenna. Hvaðan ætli Ferðamaður hafi þ ær hugmyndir? Freyja stendur á fætur, kemur auga á félaga sinn í FEMÍNISTAFÉLAGINU. FEMÍNISTINN er með fljótandi sápu í fórum sínum. Þær hella sápu í bjór Ferðamanns. Segja honum að drekka; Ferðamanni veiti ekki af að þvo á sér sorakjaftinn.
Freyja veltir fyrir sér hvort Ferðamaður hafi hugsað sér útglennta Freyju sem hugsaði um fyrrverandi forseta og fósturjörðina á meðan Ferðama›ur fengi loforð Flugfélagsins uppfyllt.

Mig dreymdi draum
Það birtist í Fjölmiðli mynd af hauslausri, allsberri konu sem boðin var öllum sem vildu ómaka sig. Við tókum okkur öll til og sögðum upp áskriftinni. Skrifuðum Ábyrgðaraðilunum bréf og létum vita að Fjölmiðilinn yrði ekki keyptur fyrr en tekin hefði verið ábyrg afstaða gegn klámi. Málið var í vinnslu hjá Ábyrgðaraðilunum þegar ég rumskaði. Það er óvíst hvernig fer, Fjölmiðilinn gæti endað á hausnum slíkur er samtakamáttur FEMÍNISTA.

Mig dreymdi draum, mikið var þetta góður draumur
- AFNEMUM SKILIN MILLI DRAUMS OG VERULEIKA.
Við erum hingað komin af því við viljum breyta heiminum. Ég ætla, með ykkur og þið með mér, að breyta heiminum. Við eigum eitthvað sameiginlegt.
Þetta er hnykill, búinn til úr ótal mismunandi þráðum sem þó mynda eina heild. Sameiningarþráður. Ég legg til að við auðkennum okkur með sameiningarþræði. Þau ykkar sem þekkið FEMÍNISTA sem ekki gátu verið með okkur hérna í kvöld takið aðeins lengri þráð og gefið þeim af ykkar þræði.