Kosningar 2003
FEMÍNISTAFÉLAG ÍSLANDS
Sjálfstæðisflokkur

Heimsókn í kosningaskrifstofu Sjálfstæðismanna Lækjargötu í maí 2003

35. landsfundur Sjálfstæðisflokksins 2003

Ályktun um jafnréttismál

Sjálfstæðisflokkurinn er hreyfing fólks sem saman vill skapa þjóðfélag þar sem framtak og elja einstaklinga getur borið ríkulegan ávöxt. Til þess að frelsi einstaklinga sé hámarkað er Sjálfstæðisflokknum í mun að jafnrétti sé á milli einstaklinga í öllu sem þeir kynnu að taka sér fyrir hendur. Ábyrgð á jafnrétti þegna landsins hvílir á öllum Íslendingum en þó er mikilvægt að hið opinbera sýni gott fordæmi í jafnréttismálum.

Árangur

Á síðustu árum hefur mikill árangur náðst í jafnréttismálum sem má að miklu leyti þakka frumkvæði Sjálfstæðisflokksins. Lögbundinn réttur einstaklinga af báðum kynjum er jafn og fæðingar- og foreldraorlofslög eru að fullu komin til framkvæmda. Mikilvæg viðhorfsbreyting hefur orðið og nú tekur við jafn réttur foreldra til fæðingarorlofs sem stuðlar að jafnrétti kynja á vinnumarkaði. Lánasjóður íslenskra námsmanna hefur aukið frelsi einstaklinga með því að auka rétt sambýlisfólks og hjóna á námslánum án þess að einstaklingur sé bundinn af tekjum maka síns. Einkavæðing er jafnréttismál og á undanförnum tólf árum hefur Sjálfstæðisflokkurinn staðið að víðtækri einkavæðingu. Reynslan sýnir að arðsemiskrafa til fyrirtækja eykst um leið og þau eru færð úr ríkiseigu og um leið aukast líkurnar á því að jafnréttissjónarmið séu höfð að leiðarljósi við ráðningar. Þetta á við um ráðningar í stjórnunarstöður og launajafnrétti enda eru fyrrgreindir þættir í betri farvegi í einkafyrirtækjum en hjá hinu opinbera. Sjálfstæðisflokkurinn fagnar auknum hlut kvenna í atvinnusköpun. Ljóst er að eftir því sem fleiri konur ná árangri í atvinnurekstri og verða sýnilegri í stjórnunarstöðum, verður það öðrum konum hvatning. Árangur verkefna sem kostuð eru af atvinnulífinu eins og t.d. Auður í krafti kvenna er einstaklega ánægjulegur og sýnir að fjöldi kvenna hefur fullan hug á að finna kröftum sínum viðnám í áhættusömum og krefjandi atvinnurekstri.

Breytingar voru gerðar á barnalögum þannig að sýslumenn bjóða nú aðilum í umgengis- og forsjármálum sérfræðiráðgjöf. Þetta hefur leitt til sátta í erfiðum málum og þannig dregið úr þjáningum barna og fjölskyldna þeirra.

Markmið

Enn er að mörgu að vinna og stefna Sjálfstæðisflokksins er að eyða allri mismunun á milli kynja og fyrirbyggja það mögulega ójafnrétti sem skapast. Þannig þarf ævinlega að fylgjast með jafnrétti og gæta að því að ýmist getur hallað á karla eða konur.

Teikn eru á lofti um að ójafnvægi milli kynja sé í tengslum við heimili og menntakerfi landsins. Brottfall er hærra hjá drengjum en stúlkum auk þess sem að ofvirkni greinist oftar hjá drengjum en stúlkum. Konur sækja minna í tæknigreinar en karlar en hlutföll kynja í háskólanámi eru að skekkjast og eru konur nú 70% nýskráðra. Spáð er áframhaldandi sókn kvenna í háskólanám hlutfallslega á kostnað karla.

Lagt er til að beitt verði fyrirbyggjandi aðgerðum sem breyti námsframboði þannig að það heilli stúlkur og drengi að jöfnu og að úrræðin dragi úr brottfalli drengja um leið og þau vekji áhuga þeirra á háskólanámi. Lögð verði rík áhersla á fjölbreytt framboð verknáms- og bóknámsleiða á framhaldsskólastigi. Lagt er til að karlmenn verði hvattir til starfa innan skólakerfisins, þannig að börn alist upp við fyrirmyndir og áhrif jafnt frá körlum sem konum.

Þótt margt hafi áunnist í jafnréttismálum á síðastliðnum árum er enn umtalsverður munur á tekjum kvenna og karla. Hluta ástæðunnar má skýra með þeirri verkaskiptingu sem er á milli hjóna á mörgum íslenskum heimilum. Þá bendir margt til þess launamun kynjanna megi einnig skýra með fordómum og viðteknum skoðunum á mismunandi getu og vinnuframlagi kynjanna sem enn eru til staðar. Slíkir fordómar bitna á atvinnulífinu í heild og dregur þannig úr samkeppnishæfni þess.

Lagt er til að hið opinbera stuðli að breytingum viðhorfa með fordæmum hjá stofnunum og ráðuneytum og dragi þannig úr fordómum á vinnumarkaði í garð kynjanna og annarra þjóðfélagshópa. Það er því jafnréttismál að hvetja til einkavæðingar fyrirtækja og auka þannig arðsemiskröfur til þeirra.

Tölur sýna að konur eiga 13-18% af íslenskum fyrirtækjum. Þetta hlutfall bendir til þess að margar hugmyndir um atvinnurekstur eru vannýttar. Þessi staðreynd hefur því takmarkandi áhrif á hagvöxt og atvinnusköpun á Íslandi.

Lagt er til að þessi hlutföll séu höfð í huga við ákvarðanatöku um stöðu frumkvöðla og nýrra fyrirtækja. Þetta tengist mjög mikið einkavæðingu opinberra fyrirtækja því einkavæðing bætir samkeppnisumhverfi nýrra fyrirtækja.

Í dag þurfa báðir aðilar í sambúð að samþykkja skiptingu ellilífeyrisréttinda. Ef samkomulag næst ekki er hætta á að sá aðili sem minna hefur greitt í ellilífeyri sitji eftir með skertan hlut. Í mörgum tilfellum eru það konur sem hafa verið heimavinnandi eða með lægri laun en maki.

Lagt er til að ellilífeyrisréttur sem áunnist hefur í hjúskap eða staðfestri samvist, muni skiptast til helminga við skilnað, án samþykkis beggja aðila.

Mikilvægt er að lögbundinn réttur foreldra, jafnt feðra sem mæðra, til umgengni við börn sín og réttur barna til umgengni við foreldra sína sé virtur í raun. Mörg dæmi eru um að réttur barna til umgengi viður feður sína sé ekki virtur í kjölfar forræðisdeilna. Þetta verður að leiðrétta. Sameiginleg forsjá verði regla við skilnað eða sambúðarslit. Umgengis- og forsjárdeilur fái hröðustu mögulegu meðferð með sérstökum dómstóli.

A090403h

Heimsókn í kosningaskrifstofu Sjálfstæðismanna Lækjargötu í maí 2003

Salvör Gissurardóttir tók ljósmyndir og setti á vefsíðu 7.maí 2003