Heimsókn í kosningaskrifstofu Samfylkingarinnar í Lækjargötu í maí 2003

Ályktun vorþings Samfylkingar, 2003

Mannréttindi, kvenfrelsi, jafnrétti

Baráttan fyrir jafnrétti og kvenfrelsi er órjúfanlegur hluti jafnaðarstefnunnar. Markmið okkar er samfélag þar sem konur og karlar taka jafnan þátt í atvinnulífi, fjölskyldulífi og mótun samfélagsins. Samfylkingin telur forgangsmál að vinna gegn hvers konar kynjamismunun og hvers konar lítilsvirðingu gegn konum. En jafnréttishugtakið nær ekki aðeins til jafnréttis kynja. Krafan um jafnrétti nær einnig til þess að skapa samfélag fyrir alla, þar sem allir njóta jafnra tækifæra, óháð kyni, efnahag, uppruna, kynhneigð eða stöðu að öðru leyti. Við berjumst fyrir réttindum barna og unglinga rétti þeirra til eðlilegs umhverfis. Við stöndum með fjölskyldunum í landinu gegn klámvæðingu og kynlífsiðnaði hvers konar. Við viljum gera það eðlilegt og auðvelt að samræma fjölskyldu- og atvinnulíf. Ríkisvaldið þarf að taka á með mun skarpari hætti á réttindum útlendinga, ofbeldi í samfélaginu og umhverfi og heill barna. Til að vinna að þjóðfélagi mannrétttinda, kvenfrelsis og jafnréttis vill Samfylkingin;

v Ráðast til atlögu við launamun kynja með samstilltu átaki ríkisvalds og vinnumarkaðar. Sett verði á fót jafnlaunaverkefni á vegum ríkis og sveitarfélaga og öllum ráðum beitt til að bylta viðhorfi samfélagsins til vinnuframlags kvenna.

v Að jafnrétti verði sett í forgang í stjórnkerfinu og sjónarmið þess fléttuð inn í alla stefnumótun og ákvarðanatöku innan stjórnsýslunnar. Sérhvert ráðuneyti og stjórnvald verði skyldað til að leggja mælikvarða jafnréttis á allar ákvarðanir sem teknar eru þannig að staða kynjanna verði greind og áhrif ákvörðunar á hana tekin.

v Að opinber tölfræði verði kyngreind.

v Að strax í leikskóla miði uppeldi barna að jafnrétti kynja og á öllum skólastigum verði markvisst unnið að því að koma í veg fyrir fordóma og mismunun.

v Að unnið verði markvisst að fjölgun kvenna á Alþingi og í sveitarstjórnum. Samfylkingin vill viðhalda þeim sögulega árangri sem flokkurinn hefur náð með jöfnum hlut kvenna og karla í þingflokki og mun vinna að sömu markmiðum hvívetna á vettvangi flokksins. Samanber nýsamþykkt jafnréttisátak Samfylkingarinnar.

v Að stjórnvöldum verði gert skylt að setja sérstaka aðgerðaáætlun sem miðar að fjölgun kvenna í æðstu stöðum samfélagsins í hópi embættismanna, dómara, prófessora og annars staðar á vettvangi hins opinbera. Í sama skyni verði staðið að sérstakri vakningu sem beint verður að viðskiptalífinu í því skyni að rétta af ójafnvægið á milli kynja í æðstu stöðum þar.

v Að konur verði virkjaðar til frekari þátttöku í þekkingarsamfélaginu. Í því skyni verði staðið að stöðugu átaki hjá stjórnvöldum, innan skólanna og á vinnumarkaði til að tryggja þátttöku stelpna og kvenna í upplýsingabyltingunni.

v Að réttur samkynhneigðra verði tryggður á sama hátt og til jafns við aðra þegna og unnið verði markvisst á öllum sviðum samfélagsins til að svo megi verða.

v Að komið verði upp neyðarlínu í samstarfi við Stígamót og Rauða krossinn.

v Að lögum sé breytt þannig að nauðvændi sé ekki saknæmt. Viðkomandi eru fórnarlömb aðstæðna og vandann á að leysa með félagslegum úrræðum.

v Að Íslendingar fylgjist vel með umræðum á vettvangi Norðurlanda- og Evrópráðs, sem og nýjum hugmyndum í baráttu við vændi, til að mynda að skoða það að gera kaup á vændi refsiverð.

v Íslendingar taki virkan þátt í alþjóðlegu samstarfi í baráttunni gegn mansali.

v Nýjar lausnir í baráttu við ofbeldi á heimilum þar sem leitast er við taka ofbeldismenn af heimilunum í stað þess að sá er verður fyrir ofbeldi þurfi að leita í athvarf.

v Með virkum hætti verði staðið gegn sífellt meira framboði af klámi og starfsemi því tengdu. Klámvæðingin er atlaga gegn mannhelgi og gegn henni mun Samfylkingin sporna af fullum krafti. Sérstaklega verði barist gegn barnaklámi og misnotkun hvers konar á börnum. Í því sambandi er þátttaka í alþjóðlegri baráttu gegn barnaklámi og dreifinug á því sérlega mikilvæg.

v Að lýðræðisleg réttindi innflytjenda verði tryggð með sérstökum lögum sem staðfesta fjölmenningarlegt eðli Íslands 21. aldarinnar. Í margbrotnu samfélagi þar sem fólk af íslenskum ættum og erlendum blómstrar saman án tillits til uppruna, auðgast íslensk menning í krafti fjölbreyttra strauma frá allri heimsbyggðinni.

v Lög um úlendinga verði gerð gagnsæ og réttarstaða útlendinga skýrð.

v Málaflokkurinn í heild sinni verði vistaður í félagsmálaráðuneyti.

Ályktun landsfundar Samfylkingarinnar 2001

Ályktun VII – Kvenfrelsi og jafnrétti

Landsfundur Samfylkingarinnar, haldinn 16.-18. nóvember 2001 lýsir því yfir að jafn réttur allra til þroska og lífshamingju sé einn hornsteinanna í stefnu Samfylkingarinnar, sem vill nýta reynslu karla og kvenna jafnt til hagsbóta fyrir samfélagið allt. Samfylkingin berst gegn kvenfyrirlitningu í hvaða mynd sem er. Hún leggur áherslu á fjölbreytileika og hafnar staðalmyndum kynjanna. Sá fjölbreytileiki þarf m.a. að endurspeglast á opinberum vettvangi og í fjölmiðlum.
Lýðræðissamfélag stendur ekki undir nafni nema með virkri þátttöku beggja kynja í stjórnmálum. Enn er nokkuð í land að þátttaka kvenna í lands- og sveitarstjórnamálum sé jafn mikil og virk og þátttaka karla. Enn þurfa konur að yfirstíga hindranir á vinnustað og heimilinu sem karlar þurfa ekki að glíma við. Því er nauðsynlegt að beita öllum ráðum til að gjörbreyta viðhorfi samfélagsins til vinnuframlags kvenna. Þó jafnrétti kynjanna hafi verið tryggt í lagalegu tilliti er efnahagslegt sjálfstæði kvenna ekki í öruggri höfn. Því er ljóst að kvenfrelsisbaráttunni verður haldið áfram á nýrri öld. Kvenfrelsisbaráttan er í eðli sínu mannréttindabarátta, sem er alþjóðleg og þekkir engin landamæri.
Landsfundur Samfylkingarinnar vill að

– ráðist verði gegn launamun milli kynja með samstilltu átaki ríkisvalds og vinnumarkaðar. Það verði m.a. gert með því að setja á fót jafnlaunaverkefni á vegum ríkis og sveitarfélaga. Jafnframt verði öllum ráðum beitt til að bylta viðhorfi samfélagsins til vinnuframlags kvenna.
- jafnrétti verði sett í forgang í stjórnkerfinu. Nauðsynlegt er að flétta sjónarmið jafnréttis inn í alla stefnumótun og ákvarðanatöku innan stjórnsýslunnar. Fundurinn vill að sérhvert ráðuneyti og stjórnvald verði skyldað til að leggja mælikvarða jafnréttis á allar ákvarðanir sem teknar eru, þannig að staða kynjanna verði greind og áhrif ákvörðunar á hana metin. Opinber tölfræði þarf því að vera kyngreind svo að staða kynjanna sé ávallt sýnileg.
- stefnt verði að jafnræði milli karla og kvenna á Alþingi og í sveitarstjórnum. Landsfundurinn beinir þeirri áskorun til kjördæmisráða og flokksfélaga Samfylkingarinnar að við skipan á framboðslista við næstu alþingiskosningar verði stefnt að því að veljist kona í fyrsta sæti, þá sé karl í því næsta o.s.frv. Veljist karl í fyrsta verði kona í öðru sæti o.s.frv. Sama sjónarmið ríki við skipan í nefndir, stjórnir og ráð.
– konur verði virkjaðar til frekari þátttöku í þekkingarsamfélaginu. Standa þarf að stöðugu átaki hjá stjórnvöldum, innan skólanna og á vinnumarkaði til að tryggja þátttöku stelpna og kvenna í mestu byltingu okkar tíma: upplýsingabyltingunni. Konur mega ekki verða eftirbátar karla í þeirri framþróun þekkingarsamfélagsins sem framundan er, hvorki í skólum né á vinnumarkaði.
– rannsóknir verði auknar á heilbrigðisvandamálum kvenna. Auka þarf fjárframlög til slíkra rannsókna og hvetja til þeirra innan heilbrigðiskerfisins.
- strax í leikskóla miði uppeldi barna að jafnrétti kynjanna og á öllum skólastigum verði meðvitað unnið að því að koma í veg fyrir fordóma og mismunun.
- kynlífsþrælkuninni – þrælahaldi 21. aldarinnar – verði úthýst og henni veitt öflug mótspyrna í lögum og lagaframkvæmd. Nauðsynlegt er að vinna gegn aukinni klámvæðingu hérlendis. Ofbeldi gegn konum er alvarlegt vandamál hér á landi sem þarf að sporna gegn með öllum tiltækum ráðum.

Salvör Gissurardóttir tók ljósmyndir og setti á vefsíðu 7.maí 2003