Ræða Katrínar Önnu talskonu
Hittið á Sólón 2. september 2003
Á forsíðu->

Myndir frá Hittinu 2. september->
Salvör Gissurardóttir tók myndir og setti á vef

Góða kvöldið kæru femínistar.
Eru virkilega svo fáir femínistar á Íslandi að þeir þekkja allir hvern annan? Þessari spurningu sá ég varpað fram í tölvupósti fyrir stuttu síðan. Ég geri ráð fyrir því að spurningin hafi verið sett fram fyrir stofnun póstlistans okkar góða sem leiddi síðan til stofnunar Femínistafélags Íslands. Upphafið á rætur sínar að rekja til nokkura stórmerkilegra kvenna sem ákváðu að stofna póstlista fyrir þá örfáu femínista sem til væru á Íslandi.

Væntingarnar voru ekki miklar. Þær vonuðust til að fá kannski eins og 40 femínista á listann. En viti konur – annað kom í ljós. Brátt voru 200 femínistar skráðir á listann og hópurinn fór sífellt stækkandi. Áður en þær vissu af voru áskrifendur á listanum orðnir 600 og umræðurnar margbreytilegar og fjörugar. Það kom nefnilega í ljós að á Íslandi er til heill aragrúi af femínistum sem þrá jafnrétti og vilja leggja sitt af mörkum til að vinna að þeim málum. Ég er ein af þeim manneskjum og á hverjum degi þakka ég þessum merkilegu konum fyrir að skapa okkur vettvang til að vinna að jafnréttismálum.

Femínistafélag Íslands fór af stað með miklu meiri krafti heldur en nokkur okkar þorði að vona. Þjóðfélagið hefur sýnt því sem við erum að gera mikinn áhuga og það segir okkur að það er mikil þörf á félagi eins og Femínistafélaginu – vettvangi fyrir þá sem vilja stuðla að jafnrétti kynjanna, vettvang þar sem við getum sýnt samtakamátt okkar í verki.

Frá stofnun félagsins hefur verið svo mikið í gangi að ég hef ekki nægan tíma til að telja það allt upp.

Ég ætla samt að stikla á stóru. Starfsemin fór af stað rétt fyrir kosningar og er óhætt að segja að tilurð félagsins hafi gert það að verkum að jafnréttismálin fengu mun stærri sess í kosningabaráttunni en annars hefði verið. Haldnir voru fundir með stjórnmálaflokkunumbæði fyrir og eftir kosningar.

Við ákváðum líka að láta í okkur heyra fyrir fegurðarsamkeppnirnar. Gáfum út bækling til að efla sjáflstyrkingu kvenna, fórum í viðtal í beinni útsendingu á keppninni Ungfrú Ísland.is, sýndum myndina Í skóm drekans og síðast en ekki síst þá settum við upp sýninguna Afbrigði af fegurð sem er sýning á sögu mótmælaaðgerða gegn fegurðarsamkeppnum frá árinu 1970 til dagsins í dag.

Við marseruðum í bleiku 1. maí og héldum veglega dagskrá í Þjóðleikhúskjallaranum. Þar var troðið út úr dyrum. Við héldum 19. júní hátíðlegan – fengum önnur kvenréttindafélög í lið með okkur og tókst að virkja stóran hluta þjóðarinnar til að mála bæinn bleikan. Við seldum merki sem á stóð “Ég kaupi konur” fyrir utan nektarstaðinn Goldfinger. Við höfum haft samband við auglýsendur og birtingaraðila auglýsinga vegna auglýsinga sem við teljum lítilsvirðandi fyrir kynin.

Við sendum frá okkur ályktun vegna hæstaréttardóms þar sem manni var talið það til refsilækkunar í líkamsárásarmáli að fyrrum sambýliskona hans hafði ítrekað reitt hann til reiði. Við sendum jafnframt frá okkur ályktun vegna uppsagna fréttakvenna á Stöð 2.
Karlmennskukvöld var haldið fyrir fullu húsi á Grand Rock Café.
Fyrir verslunarmannahelgina var öflugt forvarnarstarf í gangi, gefnir frisbeediskar með áletruninni “Nauðgar vinur þinn” og tóku nokkrar vinsælustu hljómsveitir landsins þátt í því átaki.

Við vorum í Stígamótum og í Skífunni á menningarnótt – annars vegar með kærleiksboðskap og hins vegar með sýnishorn af karlmennskuímyndinni. Við vöktum líka athygli á áætlunum um að fjölga vændishúsum í Grikklandi vegna Olympíuleikanna sem halda á á næsta ári og hrófluðum við því máli í heimspressunni. Til viðbótar eru ótal útvarps-, sjónvarps- og blaðaviðtöl sem femínistar hafa farið í þar sem tækifæri hefur gefist til að ræða málin og koma umræðunni af stað.
Að auki er félagið með öfluga útgáfustarfsemi. Heimasíðan er uppfærð reglulega, rafrænt fréttabréf er sent út í hverjum mánuði og félagið starfrækir póstlistann sem ég minnist á í upphafi.

Einnig er búið að setja upp umræðukerfi á vefnum sem ég hvet ykkur öll til að kíkja á. Slóðin þangað er feministinn.is/umraedur. Umræðukerfið er mjög auðvelt í notkun þannig að ég vona að sem flest ykkar skráið ykkur þar inn og takið virkan þátt í urmæðunni. Af nógum málefnum er að taka, svo mikið er víst.

Af þessu sést að það hefur ekki verið nein lognmolla í kringum Femínistafélagið og vonandi verður svo ekki enn um hríð. Við erum að skipuleggja öflugt starf núna í vetur. Þessi hittingur er byrjunin á því. Markmiðið með hittingnum er að veita vettvang fyrir femínista til að hittast í góðra vina hópi og ræða femínisk málefni. Hittingurinn verður á sínum stað fyrsta þriðjudag í hverjum mánuði, hér á efri hæðinni á Sólon. Dagskráin verður mismunandi mikið skipulögð. Bleika pontan verður hér alltaf og er hún opin öllum femínistum sem vilja miðla okkur af visku sinni og skoðunum.

Í lok október munum við standa fyrir femínistaviku.
Femínistavikan verður sneisafull af femíniskum atburðum. Má þar nefna að við munum hvetja allar konur til að biðja um launahækkun til að jafna launamismunin og launagreiðendur til að bera saman hjá sér laun karla og kvenna og leiðrétta launamismun ef einhver er, við verðum með listviðburði, sýningar, fyrirlestra, örnámskeið, samkeppnir, ráðstefnur, fyrirmyndakvöld og fleira.

Allir hópar félagsins verða með viðburði í vikunni. Miðað er við að sem flestir atburðir verði utan hefðbundins vinnutíma, t.d. á morgnana, hádeginu, kvöldin og um helgar. Vikunni lýkur 1. nóvember með ráðstefnu. Þema ráðstefnunnar er framtíðin og hvernig femínistar vilja sjá hana. Að loknum fyrirlestrum verða pallborðsumræður um útópíu femínista.
Af öðrum viðburðum sem eru framundan þá er sænski jafnréttismálaráðherran, hún Margareta Winberg að koma til landsins. Ellefu kvennahreyfingar á landinu standa að heimsókninni undir forystu og frumkvæði Stígamóta. Margareta Winberg hefur vakið athygli fyrir að vera ófeimin við að viðra upphátt skoðanir sem mörgum finnst óþægilegar en eru nauðsynlegar í baráttunni fyrir jafnrétti. Þetta er sem sagt hörkukona og einstakt tækifæri fyrir okkar að fá að hlusta á hana. Hún verður með fyrirlestur á Grand Hótel á laugardaginn kemur, 6. september, milli kl. 10-12. Það kostar ekkert inn og aðgangur er opinn öllum. Salurinn rúmar 200 femínista svo ég hvet ykkur eindregið til að missa ekki af þessari stórmerkilegu konu og mæta á Grand Hótel.

Að lokum vil ég hvetja ykkur öll til að taka sem mestan þátt í starfinu. Það að taka þátt er besta leiðin til að hafa áhrif á framkvæmdina og eins veitir okkur ekki af sem flestu góðu fólki til að þoka jafnréttismálunum áfram.

Mín framtíðarsýn er sú að Ísland verði fyrsta landið í heiminum til að ná jafnrétti kynjanna. Ég vona að sem flest ykkar deili þessari framtíðarsýn með mér því markmiðið er verðugt og málstaðurinn góður.

Ef að þið eruð ekki nú þegar skráð í einhvern hóp á vegum félagsins og langar til að taka þátt þá hvet ég ykkur til að tala við mig eða einhverjar af ráðskonunum núna á eftir. Við getum sagt ykkur hvaða hópar eru starfandi og hvernig þið getið haft samband við viðkomandi ráðskonur. Einnig getið þið fundið allar upplýsingar um hópana og tengiliði á heimasíðunni okkar, feministinn.is.

Ég óska ykkur síðan gleðilegs hittings og farsæls komandi femínistaárs.

Síðast uppfært 1-oct-03
Salvör Gissurardóttir