Afbrigði af fegurð
FEMÍNISTAFÉLAG ÍSLANDS

Staðalímyndahópur Femínistafélags Íslands skipulagði uppákomu í kringum Ungfrú Ísland keppnina 23. maí 2003. Þau dreifðu bæklingum fyrir utan Broadway þar sem keppnin var haldin og gáfu þátttakendum bleika boli frá Femínistafélaginu. Lögreglan kom á staðinn. Síðan kl. 20:30 um kvöldið opnuðu þau sýninguna Afbrigði af fegurð - sýning um sögu mótmælaaðgerða gegn fegurðarsamkeppnum í húsakynnum kvikmyndagerðarinnar Cut’n Paste, Íslandi, Síðumúla 12. Þar eru sýnd sögubrot allt frá árinu 1970 þegar slagorðið "Manneskja ekki markaðsvara" kom fyrst fram.

Sýningin Afbrigði af fegurð heldur síðan áfram á Veitingahúsinu Prikinu, Bankastræti 12, frá og með sunnudeginum 25. maí.

Allt frá 1. maí 1970 hafa ýmsir hópar vakið athygli á því fyrir hvað fegurðarsamkeppni stendur og frægt var þegar borgarfulltrúar Kvennaframboðsins mættu á borgarstjórnarfund í síðkjólum með kórónur og borða með merkingum eins og "Ungfrú spök" og "Ungfrú meðfærileg" árið 1985. Það vakti ekki síður athygli þegar félagar í Rauðsokkahreyfingunni krýndu kýrina Perlu Fáfnisdóttur um leið og ungfrú Vesturland var krýnd á Akranesi snemma á áttunda áratugnum.

Markmið Staðalímyndahóps Femínistafélags Íslands með þessum uppákomum er að hvetja fólk til gagnrýninnar hugsunar um hvað fegurðarsamkeppni í rauninni er og vekja athygli á því sem gert hefur verið í gegnum tíðina. Lögð er áhersla á að markmiðið er ekki að gagnrýna þátttakendur í fegurðarsamkeppni.

Lilja var í 1. maí göngunni 1970 og sér sjálfa sig á myndinni.
Hún heyrði auglýsingu í útvarpinu um að konur á rauðum sokkum væru hvattar til að mæta og ganga aftast. Hún átti enga rauða sokka en hún og vinkonur hennar mættu með klúta og fleira í rauðu. Konurnar gengu aftast með frauðplaststyttuna Manneska - ekki markaðsvara. Aðilar frá verkalýðsfélögunum vildu banna konum að ganga og leituðu til lögreglu. En það þótti ekki stætt á því þar að neita konum um að ganga niður Laugaveginn.
Femínistafélag Íslands hefur m.a. það markmið að berjast gegn neikvæðum ímyndum og auglýsingum og hefur skipulagt uppákomur í tengslum við fegurðarsamkeppnir. Þegar fegurðarsamkeppnin Ungfrú Ísland.is var haldin fyrir u.þ.b. mánuði dreifðu félagar í staðalímyndahóp bæklingum til gesta, gáfu keppendum boli merkta Femínistafélagi Íslands og efndu til sýningar á kvikmyndinni Í skóm drekans eftir Hrönn og Árna Sveinsbörn.

"Þarna er ég" segir Lilja og segir Unni söguna af 1. maí göngunni 1970
Þar gengu konur á rauðum sokkum, um haustið var Rauðsokkuhreyfingin stofnuð.

Guðrún, Embla, Ásta og Kristín undir myndinni af Magdalenu Scram og Guðrúnu Jónsdóttur borgarfulltrúum Kvennaframboðsins árið 1985. Þá mættu Magdalena og Guðrún á borgarstjórnarfund í síðkjólum með kórónur og borða með merkingum eins og "Ungfrú spök" og "Ungfrú meðfærileg" .

Þorgerður með dóttur sinni. Þorgerður stofnaði femínistapóstlistann.

Nokkrar vefslóðir
Ófagrar hliðar Ungfrú Heims (Soffía Kristín, Deiglan 4.des.2002)
Klónuð fegurð (Salvör, 22.maí 2001)
Í útsaumuðum lótusskóm (Salvör, 19. mars 2002)

Sett á vefsíðu 24. maí 2003
Salvör Gissurardóttir
Á forsíðu vefs Femínistafélags Íslands