Prófkjör

Prófkjör Samfylkingarinnar Reykjavík 2006 - spurningar til frambjóðenda

Sú hugmynd kom upp á póstlista Femínistafélagsins að senda nokkrar spurningar á frambjóðendur í prófkjöri Samfylkingarinnar sem fer fram nú um helgina og setja svörin hér inn á vefinn. Spuringarnar voru sendar á fimmtudagskvöldi og frestur til að svara gefinn til föstudagskvölds. Hér á eftir eru spurningarnar og svör frambjóðenda. Svörin eru sett inn í þeirri röð sem þau bárust.

Það skal tekið fram að Femínistafélag Íslands er þverpólitískt félag. Ástæðan fyrir því að ekki hafa verið sendir spurningar á frambjóðendur í öðrum flokkum og í öðrum prófkjörum er einfaldlega sú að hugmyndin er ný. Félagið hyggst efna til frekari aðgerða fyrir sveitarstjórnarkosningar í vor.

Hér fyrir neðan er tengill á svör þeirra frambjóðenda sem skiluðu inn svörum. Hægt er að smella á nöfn einstakra frambjóðenda eða einfaldlega rúlla í gegnum síðuna til að skoða öll svör.

Steinunn Valdís Óskarsdóttir
Andrés Jónsson
Guðrún Erla Geirsdóttir (Gerla)
Kjartan Valgarðsson
Helga Rakel Guðrúnardóttir
Oddný Sturludóttir
Björk Vilhelmsdóttir
Stefán Jóhann Stefánsson
Sigrún Elsa Smáradóttir
Ragnhildur Sigríður Eggertsdóttir
Dagur Bergþóruson Eggertsson
Dofri Hermannsson
Stefán Jón Hafstein

Allar konur í framboðinu skiluðu inn svörum en svör bárust ekki frá 4 körlum, þeim Gunnari H. Gunnarssyni, Ingimundi Sveini Pálssyni, Stefáni Benediktssyni og Stefáni Jóni Hafstein.

Leiðrétting: Svör bárust frá Stefáni Jóni Hafstein eftir að síðan hafði verið sett upp. Hans svörum hefur nú verið bætt við á listann.

Smelltu hér til að fara á forsíðu FÍ

Nafn frambjóðanda: Steinunn Valdís Óskarsdóttir, 1. sæti.

1. Telur þú að staða jafnréttismála á Íslandi sé viðunandi? Nei.Við erum rétt að byrja að breyta heiminum – það er nóg eftir.

2. Ef fyrstu spurningu er svarað neitandi: Hvernig beitir þú þér fyrir auknu jafnrétti? Í daglegum störfum mínum sem borgarstjóri er mér inngróið að líta til kynja- og jafnréttissjónarmiða. En konkret: með því að hækka lægstu laun og laun kvenna sérstaklega, veita konum framgang í stjórnunarstöður (þær eru 70% stjórnenda borgarinnar), með því að Reykjavíkurborg er með lægstu leikskólagjöldin og hæstu niðurgreiðslu vegna dagmæðra, með gjaldfrjálsum tíma sem verður 7 tímar á dag 2008, með því að taka æ fleiri börn innan við 2 ára aldur á leikskóla, með því að vilja öldrunarþjónustu frá ríkinu sem stendur sig ekki, hefta starfsemi súlustaða, með skólavistun, hollum niðurgreiddum mat í skólunum......

3. Nefndu þrjú brýnustu jafnréttismálin í dag? Launamunur kynja, kynbundið ofbeldi og klámvæðing og ég verð að nefna stöðu innflytjenda í samfélaginu þar sem vinna þarf á grundvelli þekkingar á kynjafræðum og fjölmenningarfræðum.

4. Skiptir kyn máli að þínu mati? Já

5. Ertu femínisti? Já

6. Jafnrétti er ekki bara að jafna höfðatölu kvenna og karla heldur að taka tillit til sjónarmiða og veruleika beggja kynja, viðmiða þeirra og gilda, í allri ákvarðanatöku og stefnumótun. Einkavæðing, markaðsvæðing, útboðsstefna og hagræðingar eru t.d. þættir sem geta haft kynbundnar afleiðingar þótt þær virðist kynhlutlausar á yfirborðinu. Oft eru lægstu störfin boðin út fyrst (ræsting, þvottar), gjarna með kynbundnum afleiðingum. Þá geta markaðsvæðing eða hlutafélagavæðing borgarfyrirtækja gert erfiðara að fylgjast með launum kynjanna og bregðast við honum. Hver er þín afstaða í þessum málum í rekstri borgarinnar?

Ég tek heilshugar undir þetta sjónarmið og er ekki einkavæðingarsinni. Þar sem borgin hefur farið þá leið er það oft vegna þess að beitt er þrýstingi vegna samkeppnissjónarmiða og borginni ekki talið stætt á að reka fyrirtæki fyrir opinbert fé í samkeppni við einkaaðila. En við rekum ekki ræstingarfólk til að fela svo einkafyrirtækjum verkefnið. Reykjavíkurborg er samfélagslega ábyrgur atvinnurekandi og leggur kapp á að jafnréttisstefnan og starfsmannastefnan nái til ALLRA starfsmanna borgarinnar.

Smelltu hér til að fara aftur efst á síðu

Nafn frambjóðanda: Andrés Jónsson, 4. sæti.

1. Telur þú að staða jafnréttismála á Íslandi sé viðunandi? Ef menn líta bara á lagabókstarfinn þá er hægt að segja að formlega séð hafi jafnrétti náðst. Allir sjá þó að enn er langt í land með að konur njóti sömu tækifæra og karlar í raun, t.d. við stöðuveitingar og launakjör.

2. Ef fyrstu spurningu er svarað neitandi: Hvernig beitir þú þér fyrir auknu jafnrétti? Mér finnst skipta mestu máli að nálgast ekki jafnréttismál sem sérstakan málaflokk heldur að jafnrétti kynjanna sé haft að leiðarljósi í allri stefnumótun og framkvæmd. Það held ég að skili okkur mestu.

3. Nefndu þrjú brýnustu jafnréttismálin í dag? Ég myndi segja launamálin og stöðuveitingar, kynbundið ofbeldi og dagvistunarmál.

4. Skiptir kyn máli að þínu mati? Auðvitað gerir það það. Okkar uppeldi, uppruni og þá auðvitað kynferði hefur að mínu mati heilmikið áhrif á það hver við erum. Eflaust meiri áhrif en margir gera sér grein fyrir. Svo sést það auðvitað klárlega í t.d. launaumslagi kvenna að kyn þeirra skiptir máli. Launin eru lægri eingöngu vegna kyns.

5. Ertu femínisti? Ég held ég geti svarað því játandi. Mér er umhugað um jafnrétti og kvenfrelsi. Ég vil að konur og karlar hafi jöfn tækifæri, ekki aðeins í orði heldur að veruleikinn sé þannig líka.

Ég er sammála þessu og vísa í svar 2. Með því á ég að við að jafnréttismálin séu alltaf með í allri umræðunni, þannig að öll mál séu skoðuð þannig að menn hafi í huga að ákvarðanir sem kannski líta ekki út fyrir að hafa ólík áhrif á kynin geta gert það.
Það sést hjá borginni að það skiptir máli að vera meðvitaður um þessi mál. Það held ég að borgaryfirvöld hafi verið í mannaráðningum og þar hefur líka verið vilji til þess að taka á launamálum.
Einkavæðing hefur oft verið gagnrýnd fyrir að vera einkavinavæðing. Það væri kannski fróðlegt að skoða það hverjir einkavinirnir eru, hvort að það sé þannig að þeir séu karlar frekar en konur. Mig grunar að svo sé.
Mestu máli skiptir held ég er að hafa jafnréttismál og jafnréttissjónarmið að leiðarljósi í allri stefnumótun. Til þess að ná raunverulegum árangri þarf þetta að vera málaflokkur sem fólk lítur svo á að verði að skoða í tengslum við allar ákvarðanir.

Smelltu hér til að fara aftur efst á síðu

Nafn frambjóðanda: Guðrún Erla Geirsdóttir, 4. - 6. sæti.

1. Telur þú að staða jafnréttismála á Íslandi sé viðunandi? Nei. Ég býð mig fram fyrst og fremst til að leiðrétta ójöfnuð í öllum sínum myndum. Er búin að vera í baráttunni síðan við stofnuðum Kvennaframboðið 1982.

2. Ef fyrstu spurningu er svarað neitandi: Hvernig beitir þú þér fyrir auknu jafnrétti? Eins og kemur fram á heimsíðu minni www.gerla.is undir Mínir Málflokkar: Jafnrétti og jafnræði. Þá vil ég að allar áætlanir og tillögur innan borgarkerfisins séu lesnar með með ,,jafnréttisgleraugum” áður en þær fá samþykki. Það er að segja raunverulega samþættingu.

3. Nefndu þrjú brýnustu jafnréttismálin í dag? Ef allar áætlanir og tillögur eru lesnar með ,,jafnréttisgleraugum” og tekið tillit til þess við endanlega ákvarðanatöku, kemur mjög margt af sjálfu sér. Brýnustu málin sem tengjast borgarstjórninni eru:

1.að brúa bilið milli fæðingarorlofs og leikskóla.
2. Sveigjanlegri vinnutíma fyrir alla starfsmenn borgarinnar.
3. Ég hef margoft bent á að við listverkainnkaup og sýningar sem og annað sem að menningu snýr í borginn þarf að leiðrétta þann 30% mun sem er á körlum og konum. Það munar í dag um 30% t.d. á verði listaverka sem keypt eru hjá borginni. Það sama á við um sýningar þær eru miklu færri þó konur séu fleiri sem listamenn og hafi verið það í nær 30 ár.

4. Skiptir kyn máli að þínu mati? Já kyn skiptir máli. Ég gæti nefnt mörg dæmi frá fyrstu árum Kvennafrmboðsins þegar við vorum að gera okkur grein fyrir að konur horfa allt öðruvísi á málin en karlar. Skipulagsmál eru gott dæmi um það. .

5. Ertu femínisti? Já og kann ekki annað og er stolt af því.

Ég vísa aftur í Málefni mín á www.gerla.is

Smelltu hér til að fara aftur efst á síðu

Nafn frambjóðanda: Kjartan Valgarðsson, 3. sæti.

1. Telur þú að staða jafnréttismála á Íslandi sé viðunandi? Nei

2. Ef fyrstu spurningu er svarað neitandi: Hvernig beitir þú þér fyrir auknu jafnrétti? Með því að tala fyrir breytingum á hugarfari, t.d. með því að fjölga konum í bílstjóraliði Gámaþjónustunnar hf. Einnig með því að opna augu samferðarmanna fyrir því að karlar fá störf, stjórnunarstöður, vegtyllur og há laun vegna þess að þeir eru karlar.

3. Nefndu þrjú brýnustu jafnréttismálin í dag?

1. Ráðast ákveðið gegn kynbundnu ofbeldi
2. Afnema kynbundinn launamun.
3. Fjölga körlum í ”kvennastörfum” og konum í ”karlastörfum.”

4. Skiptir kyn máli að þínu mati? Já, karlar og konur eru ekki jafnsett né njóta þau jafnra tækifæra, vegna kyns.

5. Ertu femínisti? Já

Ég tel að það sé dyggð að fara vel með skattfé og það eigi að spara með útboðum. En það veldur hver á heldur. Það er hægt að standa mjög illa að útboðum eins og fjöldi dæma er um.
Ég tel algerlega ótæk rök gegn útboðum eða breytingu á rekstrarformi að ekki sé hægt að fylgjast með launum, fyrir utan að ég er ekki viss um að það sé rétt. VR gerir árlega launakönnun og fleiri kanna laun árlega, jafnvel oftar. Þess vegna er okkur ljós launamunur kynjanna. Launamunur kynjanna hefur minnkað hjá Reykjavíkurborg veruleg undanfarin ár. Skýring þess er pólistískur vilji, en ekki rekstrarform.
Ég er almennt sammála því sem segir í spurningunni um tillit til sjónarmiða beggja kynja og vísa í góða grein Sóleyjar Tómasdóttur um það í Morgunblaðinu nýlega. Ég mun beita mér fyrir því, verði ég kjörinn borgarfulltrúi, að þessara sjónarmiða verði gætt.

Smelltu hér til að fara aftur efst á síðu

Nafn frambjóðanda: Helga Rakel Guðrúnardóttir, 5. - 6. sæti.

1. Telur þú að staða jafnréttismála á Íslandi sé viðunandi? Miðað við önnur ríki þá má segja að staða jafnréttismála sé góð hér á landi en ég tel þó að við getum gert enn betur.

2. Ef fyrstu spurningu er svarað neitandi: Hvernig beitir þú þér fyrir auknu jafnrétti? Eitt dæmi er þátttaka mín í þessu prófkjöri og sú aðferðafræði sem ég hef fylgt í þeirri baráttu. Ég vil að allir hafi jafnan rétt til þátttöku í pólitík, óháð efnahag og tengslum. Hef ég því nær einungis notað þau tól sem við frambjóðendur höfum haft jafnan aðgang að s.s. sameiginlegan kynningarbækling og fundi.

3. Nefndu þrjú brýnustu jafnréttismálin í dag? Í borgarmálunum eru það þessi mál:

Jafnt aðgengi og upplýsingar um þjónustu.
Aukin sveigjanleiki til að mæta þörfum þeirra sem ekki passa inn í kerfið.
Aukin þekking á samfélaginu og margbreytileika þess.

4. Skiptir kyn máli að þínu mati? Já. Við erum ekki eins og tel ég það kost sem við eigum að nýta.

5. Ertu femínisti? Nei, ég hef aldrei talið mig femínista en er þó sammála flestu því sem femínistar standa fyrir enda er ég jafnréttissinni.

Í hagræðingarmálum mættum skoða betur leiðir til að draga úr þörf á yfirvinnu enda hefur það sýnt sig að hún er að mestu leyti unnin af karlmönnum. Einnig þurfum við að gera betur í endurmenntun svo að starfsmenn séu betur undirbúnir fyrir breytta tíma.
Ég vil líka sjá jafnréttisáætlanir með mælanlegum markmiðum og eftirliti og jafnréttisvottuð launakerfi í öllum stofnunum borgarinnar.

Smelltu hér til að fara aftur efst á síðu

Nafn frambjóðanda: Oddný Sturludóttir, 4. sæti.

1. Telur þú að staða jafnréttismála á Íslandi sé viðunandi? Nei.

2. Ef fyrstu spurningu er svarað neitandi: Hvernig beitir þú þér fyrir auknu jafnrétti? Með því að bæta snarlega úr dagvistunarvanda yngstu Reykvíkingana, berjast fyrir jöfnum launum karla og kvenna, hækka hlutfall kvenna í valdastöðum, þétta byggðina og hækka laun kvennastétta.

3. Nefndu þrjú brýnustu jafnréttismálin í dag? Launajafnrétti, dagvistunarmál og hugarfarsbreyting!

4. Skiptir kyn máli að þínu mati? Já. Í heiminum búa jú karlar OG konur. Nýtum krafta allra – öllum í hag.

5. Ertu femínisti? Já. Já. Já.

Ætíð verður að taka tillit til sjónarmiða og reynsluheims beggja kynja við stefnumótun og ákvarðanartöku í rekstri Reykjavíkurborgar. Höfuðborg Íslands á að vera leiðandi nútímaborg og halda áfram að vekja athygli fyrir hugrekki í jafnréttismálum. Látum ekki eldinn kulna - hellum frekar olíu á hann!
www.oddny.is – Undir tenglinum “Jafnrétti – nammi namm” eru ýmsar greinar um konur, mæður, meyjur, hárgreiðslu og hugsjónir. Áfram konur.

Smelltu hér til að fara aftur efst á síðu

Nafn frambjóðanda: Björk Vilhelmsdóttir, 3. sæti.

1. Telur þú að staða jafnréttismála á Íslandi sé viðunandi? Nei

2. Ef fyrstu spurningu er svarað neitandi: Hvernig beitir þú þér fyrir auknu jafnrétti? Spyrja áður en ákvörðun er tekin hvaða áhrif ákvörðunin hefur á stöðu kvenna og þá hvernig. Taka tilllit til svarsins áður en næstu skref eru tekin.

3. Nefndu þrjú brýnustu jafnréttismálin í dag? Jafna launamun kynjanna, taka tillit til kynja í uppeldisstarfi og styðja sérstaklega konur sem eru í minnihlutahópum.

4. Skiptir kyn máli að þínu mati? Já

5. Ertu femínisti? Já

6. Jafnrétti er ekki bara að jafna höfðatölu kvenna og karla heldur að taka tillit til sjónarmiða og veruleika beggja kynja, viðmiða þeirra og gilda, í allri ákvarðanatöku og stefnumótun. Einkavæðing, markaðsvæðing, útboðsstefna og hagræðingar eru t.d. þættir sem geta haft kynbundnar afleiðingar þótt þær virðist kynhlutlausar á yfirborðinu. Oft eru lægstu störfin boðin út fyrst (ræsting, þvottar), gjarna með kynbundnum afleiðingum. Þá geta markaðsvæðing
eða hlutafélagavæðing borgarfyrirtækja gert erfiðara að fylgjast með launum kynjanna og bregðast við honum. Hver er þín afstaða í þessum málum í rekstri borgarinnar?

Launajafnrétti og réttlát kjör eiga að vera við líði hvort sem er á opinberum eða almennum vinnumarkaði. Það er hlutverk feminískra hagsmunasamtaka og stéttarfélaga að fræða fólk um þessa hluti og aðstoða þá sem standa höllum fæti á vinnumarkaði. Ég tel ekki að borgin eigi að halda öllum rekstri á sinni hendi í þeim eina tilgangi að gæta kjara þeirra lægst launuðu því það hefur sýnt sig að lægstu launin eru oft á opinbera vinnumarkaðnum. Ég hef beitt mér fyrir því að kjör og réttindi starfsmanna í fyrirtækjum sem fara úr opinberum rekstri séu tryggð.

Smelltu hér til að fara aftur efst á síðu

Nafn frambjóðanda: Stefán Jóhann Stefánsson, 3. sæti.

1. Telur þú að staða jafnréttismála á Íslandi sé viðunandi? Nei.

2. Ef fyrstu spurningu er svarað neitandi: Hvernig beitir þú þér fyrir auknu jafnrétti? Með því að fylgja jafnréttishugsjónum í starfi og lífi og samþættingu kynja- og jafnréttissjónarmiða við pólitískar ákvarðanir.

3. Nefndu þrjú brýnustu jafnréttismálin í dag? Eyða kynbundnum launamun, koma í veg fyrir ofbeldi gegn konum og börnum, þ.m.t. klámvæðingu og jafna vinnuálag og verkaskiptingu kynjanna.

4. Skiptir kyn máli að þínu mati? Já, og þess vegna þarf að taka tillit til kynjasjónarmiða í stjórnmálum, á vinnustöðum og í samfélaginu.

5. Ertu femínisti? Þegar ég var aðalfulltrúi í jafnréttisnefnd var ég stundum kallaður harðasti feministinn í hópnum. Ég vil eyða kynjamismunun og er því feministi.

Við ákvarðanatöku þarf að gæta að samþættingu kynja- og jafnréttissjónarmiða. Jafnréttisumræða á að vera virk innan fyrirtækja og stofnana í borginni, jafnréttisstefnu og jafnréttisáætlanir á að vinna og starfsmenn verða að sinna þessum málaflokki. Fjölga þarf konum í stjórnum og yfirmannastöðum í fyrirtækjum og í opinbera geiranum. Með hlutafélagavæðingu minnka áhrif opinberrar stefnumótunar og aðgerða, þótt það sé ekki algilt, því afturhaldsþverhausar í opinberri þjónustu geta líka staðið gegn jafnréttisáformum. Hagræðing bitnar oft verst á konum, því þær eru meira háðar ýmissi mælingu, t.d. í símaverum og við færibönd. Þessu verður að breyta. Samtök á vinnumarkaði og stjórnendur fyrirtækja verða að færa jafnréttisstefnu ofar. Það þarf að minna á að þau fyrirtæki sem setja jafnrétti á dagskrá eru oft betur rekin en hin.

Smelltu hér til að fara aftur efst á síðu

Nafn frambjóðanda: Sigrún Elsa Smáradóttir, 2. - 4. sæti.

1. Telur þú að staða jafnréttismála á Íslandi sé viðunandi? Nei !

2. Ef fyrstu spurningu er svarað neitandi: Hvernig beitir þú þér fyrir auknu jafnrétti?
Ég set mér þau markmið í persónulegu mati, þar sem ég sendi mín jákvæðu og neikvæðu boðmerki til fólks í persóulegum samskiptum svo ég tali nú ekki um þar sem ég virkilega hef eitthvað að segja um afdrif þess, að meta manneskjuna sjálfa og hvað hún hefur að segja, ekki hvernig hún lítur út, hvernig hún er klædd, hverjum hún er gift eða hverra manna hún er. Ég reyni að sjá hæfileikana og hverju þeir geti skilað og ég verðmet hæfileikana á fleiri skölum en fjárhagslegum. Umönnun manna er ekki ómerkilegri en umönnun peninga. Ég veit hvað það er í mínu lífi sem hefur reynst erfiðast að yfirstíga til að komast áfram og ég veit hvað er hægt að gera til að gera öðrum það auðveldara. Ég tel að fæðingarorlof feðra sé stórt skref í rétta átt og við eigum eftir að uppskera það í jafnréttisbaráttunni þegar fram í sækir. En ég tel að betur þurfi að gera í því kynbundið fæðingarorlof karla og kvenna á að vera jafn langt 6 mánuðir hjá hvoru um sig. Við verðum að tryggja leikskólavistun fyrir þá sem þess óska strax frá lokum fæðingarorlofs og ég mun berjast fyrir því og ná árangri. Við verðum að gera það sem í okkar valdi stendur til þess að meta "kvennastéttir" á launalega sambærilegum mælikvörðum og við metum "karlastéttir". En umfram allt það er einstaklingurinn sem skiptir máli, það er einstaklingurinn sem á að njóta sannmælis og kannski það mikilvægasta sem ég geri í jafnréttisbaráttu er að hrósa einstaklingum sem standa sig vel og kvetja vinkonur mínar, samstarfskonur og aðrar konur sem á samskipti við. Allir þurfa hrós allir stækka af hrósi og það kostar ekkert.

3. Nefndu þrjú brýnustu jafnréttismálin í dag? Jafnrétti í launum og stöðuveitingum, jafnrétti í umgengni við börn.

4. Skiptir kyn máli að þínu mati? Já, kyn skiptir mig máli að því leyti að ég er gagnkynhneigð og gæti aldrei haft ánægju af því að sofa hjá konu og það skiptir miklu máli, þ.e.a.s að sofa hjá.

5. Ertu femínisti? Ég veit það ekki, ég hef aldrei tekið mér þann titil af því mér hefur fundist svo misjafn skilningur lagður í það orð, reyndar hef ég aldrei kallað mig neitt sem endar á -isti, ég hef aldrei sagst vera kommúnisti eða ekki kapitalisti. Mér finnst samfélagið gera alveg nóg að því að skipta fólki í flokka og ég trúi að ég eins og allt fólk sé einstök og verði þar að leiðandi ekki svo auðveldlega flokkuð. Ég er jafnréttissinni ég trúi því að karlar og konur séu jafn hæf til flestra verka. Ég held að það fari bara eftir því hvernig hver og einn les mín svör hvort ég sé flokkuð sem feministi eða ekki, það fer eftir skilningi lesandans á orðinu og hann einn getur metið hvort ég falli undir skilgreiningar eða ekki.

Því miður er það veruleiki í dag að konur eru frekar en karlar í störfum sem gefa lítið í aðra hönd, ég vona að það muni breytast á næstu árum með því að konur afli sér menntunar og séu studdar til þess sérstaklega ef fjölskylduaðstæður eru þannig að þess þurfi, við þurfum að efla mannvirðingu í okkar samfélagi við þurfum að virða og viðurkenna störf þeirra sem vinna störf sem við sjálf viljum kannski ekki vinna. Ég ætla að leyfa mér að vera ósammála þeim fullyrðingum sem lesa má úr sprurningunni ég held að sjónarmið, viðmið og gildi kynjana séu ekki svo ólík, ég held að hluti af því að breyta veruleikanum sé að viðurkenna það að karlar og konur geta haft sömu sjónarmið að leiðarljósi, viðmið og gildi okkar eru að færast nær eftir því sem við tökum jafnari ábyrgð á fjölskyldu og fjármálum fjölskyldunnar. Við verðum í stefnumótun að horfa til framtíðar, framtíðar þar sem hlutirnir verða eins og við óskum okkur og vinna okkur í þá átt. Ef stefnumótun miðar einungis að því að bregðast við stöðunni eins og hún er í dag, viðheldur hún aðeins óréttlætinu sem við búum við.
Reykjavíkurborg getur hvatt konur og kvennastéttir til þáttöku í útboðum, gert ferlið einfaldara og stutt við þessa hópa með námskeiðum í útboðssgerð svo dæmi sé tekið. En fyrst of fremst verður borgin að halda áfram að brjóta upp úreld viðmið og innleiða ný gildi í allar stéttir, þar sem jafrétti og jöfn tækiffæri beggja kynja eru höfð að leiðarljósi.

Hver er þín afstaða í þessum málum í rekstri borgarinnar?
Ég hef verið að tala sem manneskja, manneskja sem mun beita brjóstviti sínu við það að taka ákvarðanir óháð kynferði. Það þýðir ekki að ég geti lofað því að ég muni aldrei taka ákvarðanir sem muni koma kvennastéttum illa. Ég mun líta til samfélagsins alls við ákvarðanatöku, það er skylda allra sem fara með opinbert fé. En ég verðmet þá þjónustu sem kvennastéttir veita ekki síður en þá þjónustu sem hefðbundnar karlastéttir veita. En fyrst og síðast vil ég stuðla að því að útrýma hugtökum eins og hefðbundin karlastétt og hefðbundin kvennastétt. Við verðum að sjá fyrir okkur samfélagið sem við viljum hafa, þar sem jafnrétti ríkir milli karla og kvenna og stefna að því í allri stefnumarkandi ákvarðanatöku. Við þurfum að passa að við sjáum skóginn fyrir trjánum, því annars villumst við og verðum alltaf að berjast við sömu vandamálin.

Smelltu hér til að fara aftur efst á síðu

Nafn frambjóðanda: Ragnhildur Sigríður Eggertsdóttir, 6. - 8. sæti.

1. Telur þú að staða jafnréttismála á Íslandi sé viðunandi? Nei.

2. Ef fyrstu spurningu er svarað neitandi: Hvernig beitir þú þér fyrir auknu jafnrétti? Með því að liggja aldrei á þeirri skoðun minni að jafnrétti er mannréttindi en ekki forréttindi. Með því minna á að viðhorfin sem ríkja í dag endurspeglast í samfélagsgerðinni á morgun. Ef við viljum breyta verðum við að láta það koma fram á borði en ekki aðeins í orði.

3. Nefndu þrjú brýnustu jafnréttismálin í dag? Launajafnrétti, ef það yrði að veruleika myndi það um leið leysa mörg önnur vandamál ójafnréttis.
Jafnræði kvenna og karla í ráðum og nefndum sem fjalla um og taka afstöðu til þeirra mála sem þaðan eru afgreidd, þó svo það jafnræði verði að setja á með kynjakvóta.
Harðari refsingar og meiri eftirfylgni í kynferðisafbrotamálum. Það er vitað að konur og börn eru lang oftast þolendur í þess háttar málum. Með því að herða refsingar og beita meiri eftirfylgni við slíkum brotum er réttur þolandans tekinn fram yfir rétt gerandans og þar með eykst tillit til og virðing fyrir þolandanum, kynferði hans og aldri.

4. Skiptir kyn máli að þínu mati? Hvað varðar jafnrétti á kyn ekki að skipta máli. En ef við erum að tala um reynslu og upplifun í lífinu sjálfu þá er munurinn mikill. Það er bæði af hinu góða, því eftir því sem fjölbreyttari og litríkari reynsla safnast saman þess betri og meiri skilningur ætti að skapast á verðleikum kynjanna um leið og mismunur þeirra er virtur, en jafnframt af hinu illa þegar aðeins reynsla annars kynsins er talin þess verðug að taka mark á henni.

5. Ertu femínisti? Já, í orðsins fyllstu merkingu er ég það. Það er hins vegar áhyggjuefni hversu oft þetta orð er misskilið.

Hin hefðbundnu kvennastörf svo sem umönnun, barna, sjúkra og aldraðra hafa goldið fyrir það að þau hafa í gegnum aldirnar verið unnin af konum inn á heimilunum án þess að hafa verið metin til launa. Eftir að þessi störf fluttust út í atvinnulífið hafa þau aðeins verið metin til mjög lágra launa. Þetta hefur ekki tekist að leiðrétta og reyndar skort allan áhuga á að gera af þeim sem haft hafa aðstöðu og vald til. Þar til fyrir skömmu að okkar fólk í borgarstjórn með Steinunni Valdísi í fararbroddi hækkaði laun þeirra lægst launuðu í störfum hjá borginni. Við getum verið stolt af því að þau sýndu það þor sem þurfti til þessa. En það er mikið áhyggjuefni hvað gerist þegar og ef fyrirtæki sem nú eru í eigu borgarinnar skipta um eigendur. Hvernig er hægt að bregðast við því? Ég sé ekki að það sé á annan hátt en að setja bann á launaleynd. Ef fyrirtæki sér sér hag í að viðhafa launamisrétti þá verður það að gera það opinberlega og færa rök fyrir því. Um leið verður það að þola þær umræður sem með því skapast um viðkomandi fyrirtæki. Ég er hins vegar á því að fara þurfi með mikilli gát í allt sem heitir einkavæðing. Sum þjónustustörf sem borgin innir af hendi eru alls ekki þess eðlis að reikna eigi með hagnaði af þeim og þess vegna á engan hátt til þess fallin að setja í hendur einkaaðila, sem eðlilega í öllum tilfellum rekur sitt fyrirtæki með von um hagnað í huga.

Smelltu hér til að fara aftur efst á síðu

Nafn frambjóðanda: Dagur Bergþóruson Eggertsson, 1. sæti.

1. Telur þú að staða jafnréttismála á Íslandi sé viðunandi? Nei.

2. Ef fyrstu spurningu er svarað neitandi: Hvernig beitir þú þér fyrir auknu jafnrétti? Með þátttöku minni í stjórnmálum, störfum í borgarstjórn og sem reglulegur dálkahöfundur í Mbl og Fréttablaðinu 2003-2005.

3. Nefndu þrjú brýnustu jafnréttismálin í dag?

3.1. Launamunur kynjanna. Hann er óþolandi. Ég legg ríka áherslu á Reykjavíkurborg verði áfram fyrirmynd annarra atvinnurekenda og hef sett fram í verkefnaskrá minni að unnin verði áætlun til að að útrýma kynbundnum launamun hjá Reykjavíkurborg á fimm árum. Markmiðin munu nást með því að: a) Byggja á starfsmati Reykjavíkurborgar sem hefur reynst róttækt tæki til að vinna að launajafnrétti. Starfsmati er ætlað að tryggja að starfsmenn fái laun metin á sömu forsendum óháð kyni eða stéttarfélagsaðild. b) Sömu laun fyrir sömu vinnu verði megináhersla við gerð allra kjarasamninga. c) Starfsfólk geti skotið einstaklingsmálum til hlutlauss umboðsmanns ef launamunur reynist enn vera fyrir hendi að áætluninni lokinni.
3.2. Tvöföld mismunum. Flest gögn benda til þess að mörg brýnustu verkefnin í jafnréttimálum hér á landi eins og annars staðar lúti að stöðu kvenna sem tilheyra jafnframt jaðarhópi, t.d. eru af erlendu bergi brotnar eða eiga við fötlun að stríða.

Á þessu verður tekið með því að auka og efla hlutverk jafnréttisnefndar Reykjavíkurborgar eins og lagt hefur verið til undir forystu Bryndísar Ísfoldar Hlöðversdóttur og hefur verið ríkt áhugamál mitt á kjörtímabilinu.

a) Hjá fyrstu kynslóð innflytjenda skiptir fjárhagslegt sjálfstæði kvenna, atvinna og menntun miklu máli að ógleymdu því að læra íslensku sem er mikilvæg vörn gegn einangrun og réttleysi. Íslenskukennsla á vinnutíma ætti að vera skylda allra vinnuveitenda. Hún er á dagskrá nýrrar fjölmenningarstefnu sem ég hef átt hlut í að undirbúa á kjörtímabilinu.

b) Menntun og brottfall í framhaldsskóla er eitt mikilvægasta viðfangsefnið þegar önnur kynslóð innflytjenda er annars vegar. Á þessu er mjög mikilvægt að taka þar sem reynsla nágrannalandanna sýnir að sérstök tilhneiging getur verið til að ?halda stúlkum heima? eða í vinnu. Við verðum að vera vakandi fyrir þessari tilhneigingu og vinna gegn henni. Forvarnanefnd, þar sem ég á sæti, hefur styrkt verkefnið ?Framtíð í nýju landi? sem á að vera brautryðjandi á þessu sviði. Það hefur verið leitt af Anh-Dao Tran og Hildi Jónsdóttur jafnréttisfulltrúa Reykjavíkurborgar og er unnið í samstarfi fjölmargra aðila.

3.3. Kerfisbundið ójafnrétti lífeyrisgreiðslna. Umræðan um kröpp kjör eldri borgara hefur ekki dregið það nægilega vel fram að konur eru langstærsti hluti þess hóps sem hefur úr litlu að spila. Ástæðuna má rekja til ójafnréttis á vinnumarkaði og launamunar kynjanna en við bætist að konur af þessum kynslóðum hafa oft verið lítið, stopult eða jafnvel ekkert á vinnumarkaði. Þær hafa því ekki greitt í lífeyrissjóð og þurfa að lifa á strípuðum ellilífeyri frá Tryggingastofnun. Dæmið versnar enn í tilfellum kvenna sem séð hafa um uppeldi barna og farið fyrir stóru heimili en skilið síðar við menn sína. Þær fá ekki makalífeyri fyrr en að fyrrverandi mönnum sínum látnum! Á þessu þarf að taka.

4. Skiptir kyn máli að þínu mati? Já. Ef við litum fram hjá því færi margt framhjá okkur sem betur má fara.

5. Ertu femínisti? Já. Það viðgengst óréttlæti í samfélaginu sem bundið er við kyn. Allir sem horfast í augu við það og berjast gegn því eru feministar. Kannski má segja að ég hafi drukkið feminisma með móðurmjólkinni. Ég hef átt því láni að fagna að vera alinn upp af tveim femínistum, föður mínum og móður. Og vona að ég beri ekki nafnið Bergþóruson fyrir ekki neitt.

6. Jafnrétti er ekki bara að jafna höfðatölu kvenna og karla heldur að taka tillit til sjónarmiða og veruleika beggja kynja, viðmiða þeirra og gilda, í allri ákvarðanatöku og stefnumótun. Einkavæðing, markaðsvæðing, útboðsstefna og hagræðingar eru t.d. þættir sem geta haft kynbundnar afleiðingar þótt þær virðist kynhlutlausar á yfirborðinu. Oft eru lægstu störfin boðin út fyrst (ræsting, þvottar), gjarna með kynbundnum afleiðingum. Þá geta markaðsvæðing eða hlutafélagavæðing borgarfyrirtækja gert erfiðara að fylgjast með launum kynjanna og bregðast við honum. Hver er þín afstaða í þessum málum í rekstri borgarinnar?

Ég hef stýrt umfangsmiklum kerfisbreytingum hjá Reykjavíkurborg sem hefur lotið að einföldun stjórnkerfis og þjónustu, skýrari boðleiðum og breytingum í yfirstjórn. Niðurstaðan hefur meðal annars birst í stórauknum fjölda kvenna í stöðum lykilstjórnenda. Þá hefur stjórnkerfisnefnd þar sem ég gegni formennsku átt samvinnu við jafnréttisráðgjafa Reykjavíkurborgar um málstofu og umræður um áhrif nýrrar tilskipunar Evrópusambandsins í jafnréttismálum, "gender mainstreaming", og hvar kynjasjónarhorn eigi við í stefnumótun og stjórn borgarinnar.

Reykjavíkurborg hefur beitt útboðum í auknum mæli á undanförnum áratugum. Þar hafa þó fyrst og fremst verið um að ræða hefðbundin karlastörf, þ.e. verklegar framkvæmdir, þrif á götum, gras-sláttur, snjómokstur og sorphirða. Ég kann ekki svör við því að hvaða áhrif þessar breytingar hafa haft á launakjör þeirra (karla) sem við störfin vinna. Ekki hefur verið farin sú leið að bjóða út heimilisþrif, ummönnunarstörf (með undantekningu í einkareknum leikskólum og öldrunarstofnunum). Engar áætlanir eru heldur uppi um slíkar kerfisbreytingar.

Smelltu hér til að fara aftur efst á síðu

Nafn frambjóðanda: Dofri Hermannsson, 4. – 6. sæti.

1. Telur þú að staða jafnréttismála á Íslandi sé viðunandi? Nei það er ekki hægt að segja að hún sé það meðan launamunur kynjanna er eins og hann er og meðan að hlutfall kvenna í stjórnunarstöðum jafnt opinberum sem á almennum markaði er ekki hærra en raun ber vitni.

2. Ef fyrstu spurningu er svarað neitandi: Hvernig beitir þú þér fyrir auknu jafnrétti? Persónulega beiti ég mér fyrir því með því að kynna mér það sem er efst á baugi í jafnréttisumræðunni hverju sinni, með því að hvetja konur til þátttöku í stjórnmálum og þeim sviðum atvinnulífs þar sem karlar hafa verið ráðandi, með því að hvetja karla til að taka jafnan þátt í uppeldi barna sinna en ég veit af eigin raun að það hefur afgerandi áhrif á viðhorf feðra til jafnréttismála.
Á pólitísku sviði tel ég að meira megi gera í að eyða launamun kynjanna t.d. með því að afnema launaleynd þar sem því verður komið við og með því að bera saman laun kynja í sömu starfsstéttum innan fyrirtækja þar sem launaleynd er. Það má líka óhikað ræða kynjakvóta þar sem erfiðlega gengur að jafna kynjahalla á hvorn veginn sem er. Ég held líka að það sé mjög brýnt að endurskoða þátttöku Reykjavíkurborgar í launanefnd sveitarfélaga sem að mínu áliti er ekkert annað en allsherjar samráð um að halda niðri launum uppeldis- og umönnunarstétta sem eru stærstu kvennastéttirnar. Ég held að jafnréttisbaráttan þurfi að byggja á viðstöðulausri viðleitni allra meðvitaðra þegna þjóðfélagsins en umræður af þessu tagi eru að mínu mati gott innlegg í slíkt.

3. Nefndu þrjú brýnustu jafnréttismálin í dag? Jafnrétti til stjórnunarstarfa, jafnrétti til launa, janfrétti til umönnunar barna og heimilislífs.

4. Skiptir kyn máli að þínu mati? Já, kynin eru að mörgu leyti ólík og þess vegna hljóta viðhorf þeirra að vera það líka. Í jafnréttisþjóðfélagi verða því viðhorf hvors kyns að vera jafn rétthá hvort sem um er að ræða stjórnarsetu í stórfyrirtækjum eða tilhögun barnauppeldis

5. Ertu femínisti? Já. Ég tel að feministi sé sá sem leggur sitt af mörkum sem hreyfiafl í átt til jafnréttis.

Það á að hafa jafnréttissjónarmið í huga þegar ákvarðanir af þessu tagi eru teknar. Ég ítreka að ég tel að borgin eigi að taka frumkvæði í þessum málum með því að endurskoða launastefnu sína í uppeldis- og umönnunarstéttum. Laun þar eru ekki eðlileg og ekki í samhengi við mikilvægi þeirra m.a. vegna þess að þeim hefur verið haldið niðri af launanefnd sveitarfélaga.

Smelltu hér til að fara aftur efst á síðu

Nafn frambjóðanda: Stefán Jón Hafstein, 1. sæti.

1. Telur þú að staða jafnréttismála á Íslandi sé viðunandi? Nei.

2. Ef fyrstu spurningu er svarað neitandi: Hvernig beitir þú þér fyrir auknu jafnrétti? Með því að koma á því verðleikasamfélagi sem ég trúi á, að allir hafi jöfn tækifæri, að verðleikar en ekki staða, stétt eða kyn ráði framgangi eða launum. Það er hægt að gera með margvíslegu móti, svo sem starfsmati sem er kynblint, gagnsæi í stjórnsýslu, skýrum kjarasamningum, jafnréttisuppeldi og mótvægi við rótgrónum íhaldssjónarmiðum varðandi kynbundin hlutverk.

3. Nefndu þrjú brýnustu jafnréttismálin í dag? Menningarlegt og félagslegt andsvar við hefbundnum kynhlutverkum, hvort sem er með kynferðislegum undirtónum eða í atvinnugreinum;
Launajafnrétti
Að karlmenn fái jafnan rétt á við konur til að umgangast og ala upp börn sín.

4. Skiptir kyn máli að þínu mati? Já.

5. Ertu femínisti? Já.

6. Jafnrétti er ekki bara að jafna höfðatölu kvenna og karla heldur að taka tillit til sjónarmiða og veruleika beggja kynja, viðmiða þeirra og gilda, í allri ákvarðanatöku og stefnumótun. Einkavæðing, markaðsvæðing, útboðsstefna og hagræðingar eru t.d. þættir sem geta haft kynbundnar afleiðingar þótt þær virðist kynhlutlausar á yfirborðinu. Oft eru lægstu störfin boðin út fyrst (ræsting, þvottar), gjarna með kynbundnum afleiðingum. Þá geta markaðsvæðing eða hlutafélagavæðing borgarfyrirtækja gert erfiðara að fylgjast með launum kynjanna og bregðast við honum. Hver er þín afstaða í þessum málum í rekstri borgarinnar?

Svarið er að ofan, að því marki sem ég skil spurninguna.

Smelltu hér til að fara aftur efst á síðu

Smelltu hér til að fara á forsíðu FÍ