Smelltu hér til að fara á forsíðu kosningavefs FÍ

Smelltu hér til að skoða svör Framsóknarflokksins

Smelltu hér til að skoða svör Frjálslynda flokksins

Smelltu hér til að lesa svör frá Samfylkingunni

Smelltu hér til að skoða svör Sjálfstæðisflokksins

Smelltu hér til að skoða svör Vinstri grænna

  

Svör Samfylkingarinnar í Reykjavík

1. Hver er jafnréttisstefna framboðsins?
Samfylkingin byggir allt sitt starf á kvenfrelsi og lýðræði. Tvö af fimm megingildum Samfylkingarinnar eru kvenfrelsi og jafnrétti, hin þrjú eru samábyrgð, lýðræði og frelsi. Við höfum fléttað jafnréttissjónarmið inn í allt starf borgarinnar og rýnt í allar aðgerðir með tilliti til jafnréttis, og því ætlum við að halda áfram. Í tíð R-listans voru jafnréttismálin sett beint undir borgarstjóra til að ítreka mikilvægi málaflokksins og tryggja að allar ákvarðanir borgarstjórnar litist af jafnréttissjónarmiðum. Eftirfarandi texti er úr stefnuskrá Samfylkingarinnar í Reykjavík:

,,Allir íbúar Reykjavíkur eiga jafnan rétt gagnvart borginni án tillits til kynferðis, kynhneigðar, trúarbragða, stjórnmálaskoðana, uppruna, litarháttar, efnahags, fötlunar, ætternis eða annarrar stöðu. Samfylkingin hvetur til jafnrar þátttöku og áhrifa karla og kvenna í borgarsamfélaginu. Við skipan í nefndir, stjórnir og ráð skal hafa að markmiði að hlutföll kynjanna séu sem jöfnust. Tryggt verði með skipulögðu jafnréttisstarfi að konur og karlar njóti jafnréttis í þjónustu og á vinnustöðum Reykjavíkurborgar. Greiða skal konum og körlum jöfn laun fyrir jafnverðmæt og sambærileg störf. Stuðla skal að sveigjanlegum vinnutíma þannig að samræma megi einkalíf, fjölskylduábyrgð og starf. Alvarleg eða endurtekin kynferðisleg áreitni á vinnustað skal varða áminningu eða brottrekstri úr starfi."

Fulltrúi Samfylkingarinnar leiddi vinnu við nýsamþykkta mannréttindastefnu Reykjavíkurborgar. Í þeirri stefnu er tekið á jafnrétti kynjanna á víðtækari hátt en áður hefur verið í stefnu borgarinnar. Við lítum á mannréttindastefnuna sem hluta af okkar stefnumálum, enda var það kappsmál okkar að jafnréttisstefnan yrði dýpkuð og endurbætt, eins og hefur verið gert í núverandi mannréttindastefnu.

2. Hvernig mun flokkurinn beita sér fyrir því að ná fram launajafnrétti í borginni að afloknum kosningum?
Allt frá því R-listinn tók við árið 1994 hafa konur, sem nú eru innan raða Samfylkingarinnar, verið fremstar í flokki í baráttunni fyrir jafnrétti innan borgarinnar. Samfylkingarkonurnar Steinunn Valdís, Kristín Blöndal og Bryndís Ísfold hafa allar stýrt Jafnréttisnefnd Reykjavíkur á síðastliðnum þremur kjörtímabilum. Óútskýrður launamunur á milli kynja er langtum minni hjá Reykjavíkurborg en annars staðar og Reykjavíkurborg hefur verið í forystu sveitarfélaga hvað varðar útrýmingu kynbundins launamunar. En betur má ef duga skal. Það þarf að gera launakönnun hið fyrsta og meta stöðuna. Að okkar mati er afnám launaleyndar lykillinn að launajafnrétti, en það var meðal annarra eitt af nýju ákvæðunum í nýju mannréttindastefnunni.

3. Nú blasir við að umönnum bæði ungbarna, foreldra og veikra fjölskyldumeðlima er að færast meira yfir á heimilin sökum skorts á úrræðum í borginni. Hvernig hyggst þinn flokkur bregðast við vandanum og koma í veg fyrir að þessi ólaunaða vinna falli á konur í meira mæli en karla?
Þetta er margþætt spurning. Í málefnum eldri borgara hefur Samfylkingin margoft lýst yfir vilja til að taka yfir málaflokkinn svo öll sú mikilvæga nærþjónusta sé á einni hendi. Við erum sannfærð um að sveitarfélögin séu betur í stakk búin að tryggja eldri borgurum örugga þjónustu og í því skyni höfum við talað um þjónustutryggingu fyrir eldri borgara. Samfylkingin vill tryggja samfellu í vistun yngstu Reykvíkinganna, frá því fæðingarorlofi lýkur og þar til leikskólinn tekur við um tveggja ára aldur. Það hefur verið skortur á dagforeldrum, þrátt fyrir að borgin hafi gripið í taumana og með átaki hafi þeim fjölgað lítið eitt. Dagforeldrakerfið þarf að styrkja og okkar fyrsta verk eftir kosningar verður að leita leiða til að skráningarkerfi dagforeldra verði miðlægt og á hendi þjónustumiðstöðvanna. Við sjáum fyrir okkur að næsta skref í leikskólamálum sé að útbúa leikskólana þannig að þeir geti tekið við börnum frá allt að eins árs aldri. En við erum á þeirri skoðun að fæðingarorlofið þurfi að lengja, það kemur vitanlega smáfólkinu og foreldrum þeirra best. Það er ákaflega varasamt að taka upp heimgreiðslur til foreldra, að okkar mati færir það jafnréttisbaráttuna mörg skref til baka og við þurfum sannarlega ekki á því að halda.

4. Klámvæðingin er sífellt að aukast með tilheyrandi skaðlegum afleiðingum fyrir ungt fólk. Hvernig hyggst þinn flokkur taka á þessum vanda að afloknum kosningum?
Samfylkingin telur að ríkið ætti að grípa hressilega í taumana og sporna við óæskilegum afleiðingum klámvæðingarinnar með lagasetningu og fleiri beinskeyttum aðgerðum. Fyrir Reykjavíkurborg sem stjórnvald eru úrræðin kannski ekki jafn mörg en við höfum lagt ríka áherslu á að starfsemi súlustaða í borginni sé takmörkuð og höldum því að sjálfsögðu áfram. Fræðslu má efla víðar og í þeim efnum felast mörg sóknarfæri, hvort sem um skóla- íþrótta- eða félagsstarf barna og unglinga er að ræða. Einnig þarf að gæta þess að starfsmenn- og konur borgarinnar séu vel með á nótunum í öllu sínu starfi og ráðgjöf og hafi jafnréttismarkmið borgarinnar að leiðarljósi. Það er mikilvægt að styðja við frjáls félagasamtök sem berjast gegn klámvæðingunni, svo sem Stígamót, Femínistafélagið og fleiri. Átak þarf að gera varðandi sjálfsmynd unglingsstúlkna, með sérstöku námsefni (sem reyndar er á hendi ríkisins en þyrfti að vera á hendi sveitarfélaganna eins og annað tengt grunnskólanum), fyrirlestrum og kennslustundum. Ef ábyrgð námsefnis færi yfir til sveitarfélaganna yrði það okkar fyrsta verk að endurskoða sögubækurnar og bæta inn í nokkrum köflum um sögu kvennabaráttu á Íslandi!

5. Hvaða leið teljið þið árangursríkasta til að auka þátttöku kvenna í stjórnmálum?
Samfylkingin leggur áherslu á jafnan hlut kynjanna á framboðslistum og fyrir borgar- og sveitarstjórnarkosningarnar í ár eru fleiri konur í efstu sætum hjá Samfylkingunni en öðrum flokkum. Fyrirmyndir skipta gríðarlega miklu máli fyrir ungar konur og stelpur en ekki síður mikilvæg eru málin sem rædd eru og að sjónarmið kvenna nái í gegn. Nýverið stofnuðu konur í Samfylkingunni Kvennahreyfingu, sem er hugsuð til að styðja við bakið á Samfylkingarkonum og gæta þess að kvennasjónarmiðum sé gert hátt undir höfði. Staðreyndin er sú að konur hafa oft aðrar áherslur í pólitík en karlar og það skiptir máli að ræða þau mál innan flokksins, ekki síður en ,,hefðbundin" karlamálefni. Sterkar konur sem tala máli kvenna, tala um mál sem við konur setjum á oddinn og þykja mikilvæg, eru gulls ígildi og við þurfum að róa að því öllum árum að fá fleiri konur til liðs við okkur og aðstoða þær og hvetja á alla lund.

6. Er framboðið skilgreint sem femínískt framboð? Ef nei, hvers vegna ekki?
Samfylkingin skilgreinir sig sem jafnaðarmannaflokk með femínískar áherslur og hrygglengjan í Samfylkingunni er gamli Kvennalistinn. Á stofnfundi Samfylkingarinnar í maí árið 2000 var eftirfarandi samþykkt: Samfylkingin er stjórnmálaflokkur sem aðhyllist markmið og leiðir jafnaðarstefnunnar. Stefna flokksins og störf byggjast á frelsi og lýðræði, kvenfrelsi, jafnrétti og samábyrgð. Innan Samfylkingarinnar hafa frá upphafi verið konur sem hafa með verkum sínum sýnt það og sannað að þær starfa fyrir flokk sem dansar í femínískum takti.

7. Skiptir kyn máli? Hvers vegna eða hvers vegna ekki?
Það skiptir sannarlega máli að rödd kvenna heyrist til jafns við karla. Í valdatíð R-listans höfum við séð að kyn hefur skipt máli og það þurfti femínískar konur til að koma jafnréttismálunum á kortið. Leikskólabyltingin var sannarlega stórt mál sem skipti sköpum fyrir reykvískar konur og hefur greitt götu kvenna á barneignaraldri í atvinnulífinu. Jafnréttismálin voru sett í öndvegi undir stjórn sterkra kvenna í R-listanum og öll umræða um jafnréttismál innan borgarinnar gjörbreyttist. Kyn skiptir máli og reynsla kvenna skiptir miklu máli. Það þarf kjark og þor til að framkvæma hlutina - það er ekki nóg að skreyta stefnuskrárnar með fögrum orðum um jafnrétti, rétt eins og jólatréð fyrir jólin. Jafnrétti og kvenfrelsi er ekki stofustáss og innantóm orð á blaði heldur grjótharður málaflokkur sem þarf að berjast fyrir með kjafti og klóm.

8. Hvernig hyggst þitt framboð beita sér fyrir úrlausn á dagvistunarvanda barna frá 9 - 24 mánaða aldurs?
Í stefnuskrá Samfylkingarinnar í Reykjavík segir að við viljum nýta þjónustumiðstöðvar borgarinnar í því skyni að aðstoða foreldra við að finna úrræði við hæfi, við viljum gjaldfrjálsan leikskóla í áföngum, fjölga leikskólaplássum fyrir yngsta aldurshópinn og efla dagforeldrakerfið. Vannýtta gæsluvelli má nýta til að húsa samrekstur áhugasamra dagforeldra. Í dag er mannekla á leikskólum borgarinnar ekki lengur vandamál og stórt skref var stigið í desember síðastliðnum þegar Steinunn Valdís gekk fram fyrir skjöldu og hækkaði laun ófaglærðra inni á leikskólunum. Það er ljóst að við þurfum að byggja kríladeildir við einhverja leikskólana og taka við yngri börnum inn á leikskólana og að því marki viljum við stefna næst. Dagforeldrar verða áfram góður valkostur fyrir þá foreldra sem kjósa heimilislegt andrúmsloft, smærri barnahópa og persónuleg tengsl.

9. Telur þitt framboð þörf á að jafnrétti sé ávallt haft í fyrirrúmi í hverri kennslustund sem fram fer í grunnskólum (og öllum skólastigum) og ef svo er hvernig? Sérðu fyrir þér að þörf sé á að endurskoða námsskrá og útfærslu kennslu barna með þetta í huga?
Við gerum auðvitað skýlausa kröfu til þess að jafnrétti sé haft í heiðri í skólum borgarinnar sem og á öðrum starfsstöðum. Námsskrárgerðin er í höndum ríkisins en við þurfum öll að vera á verði og grípa til aðgerða ef misbrestur verður á og grunur leikur á að stelpur og strákar fái ekki sömu meðferð. Jafnréttisnefnd Reykjavíkurborgar styrkti námsefni fyrir þremur árum sem ætlað var til jafnréttiskennslu í skólum en Námsgagnastofnun og Menntamálaráðuneyti hafa ekki tekið það upp á arma sína og kynnt það fyrir kennurum, þrátt fyrir ítrekaðar beiðnir borgarinnar. Einstaklingsmiðað nám, eins og grunnskólar Reykjavíkurborgar byggja starf sitt á, hefur nýst samviskusömum og duglegum nemendum sem hafa þá getað fengið verkefni við sitt hæfi. Í þeim hópi eru stelpur fjölmennar og því má draga þá ályktun að einstaklingsmiðað nám þjóni hagsmunum kvenkyns nemenda vel. Það eru mörg sóknarfæri fyrir jafnréttisfræðslu innan skólakerfisins og til að ná fram jafnrétti þurfa börn og unglingar að kunna skil á grunnhugtökum, sögunni og að tjá sig um jafnrétti. Jafnréttisnefnd er með mörg ákaflega spennandi járn í eldinum varðandi unglinga, t.a.m. sérstakt verkefni þar sem sumarstarf ÍTR er skoðað út frá kynjafræðilegu sjónarhorni. Annað verkefni er að fá unglinga til að gera jafnréttisáætlun um sitt nánasta umhverfi og svona mætti lengi telja. Í vor ákvað jafnréttisnefnd að útnefna einn grunnskóla borgarinnar móðurskóla jafnréttis auk þess sem stofnað hefur verið til samráðs við jafnréttisnefnd Hafnarfjarðarbæjar og Menntamálaráðuneytið um þróunarverkefni sem fer í gang á næsta ári.

10. Nú liggur fyrir að ein ástæða fyrir hinum mikla launamun kynjanna á Íslandi er fjöldi kvenna sem sinnir illa launuðum umönnunarstörfum. Þrátt fyrir að laun sumra þeirra hafi verið hækkuð nýlega liggur fyrir að ófaglært starfsfólk sem sinnir ræstingum o.þ.h. hlaut ekki sambærilegar hækkanir. Stór hluti þeirra sem þessum störfum gegna eru konur af erlendum uppruna. Munið þið beita ykkur fyrir hækkunum á lægst launuðu störfum, hvernig og mun verða haft til hliðsjónar að draga úr launamun kynjanna?
Reykjavíkurborg hefur verið í fararbroddi meðal sveitarfélaga um hækkun lægstu launa. Samfylkingin mun halda ótrauð áfram á sömu braut og eins og í öllum öðrum málaflokkum verða jafnréttissjónarmiðin höfð að leiðarljósi og launamunur kynjanna vandlega rannsakaður í því skyni að leiðrétta ranglætið.

******************************************************************************************
Viðbótarspurning - Samfylkingin

Nú hefur í nokkur ár verið óheimilt að opna nýja nektarstaði í miðbænum. Eftir að sú samþykkt tók gildi og á meðan R-listinn hefur verið við völd hafa a.m.k. 2 slíkir staðir opnað í miðbænum. Hvers vegna hefur ekki verið gripið til aðgerða gegn þessum stöðum og munuð þið gera eitthvað í málinu ef þið haldið áfram í meirihluta borgarstjórnar?
Það er kristalskýr stefna borgarinnar að veita ekki leyfi til nýrra nektarstaða. Reykjavíkurborg hefur ekki veitt vínveitingaleyfi til nýrra nektarstaða í miðbænum enda gengur það gegn okkar samþykktum. Ef fólk telur sig hafa vitneskju um að slík starfsemi fari fram, þarf að tilkynna það til lögreglu.