Svör Framsóknarflokksins í Reykjavík

1. Hver er jafnréttisstefna framboðsins?
Jafnréttisstefna framboðsins er sú sama og samþykkt Jafnréttisstefna Reykjavíkurborgar. Marsibil Sæmundardóttir sem skipar 3. sæti listans vann að undirbúningi stefnunnar og talaði fyrir henni í borgarstjórn sem formaður Jafnréttisnefndar Reykjavíkurborgar.
Við viljum stuðla að því að Reykjavíkurborg verði áfram í fremstu röð fyrir frumkvæði og faglegt starf að jafnréttismálum sem tryggi konum og körlum jöfn áhrif, tækifæri og virðingu.

2. Hvernig mun flokkurinn beita sér fyrir því að ná fram launajafnrétti í borginni að afloknum kosningum?
Við höfum mikla trú á að starfsmatið sem hefur verið tekið til notkunar hjá Reykjavíkurborg muni auka launajöfnuð. Það virðast þó vera einhverjir þættir í starfsmatinu sem eru ekki að skila sér nægilega vel og við viljum skoða hvað veldur því.

3. Nú blasir við að umönnum bæði ungbarna, foreldra og veikra fjölskyldumeðlima er að færast meira yfir á heimilin sökum skorts á úrræðum í borginni. Hvernig hyggst þinn flokkur bregðast við vandanum og koma í veg fyrir að þessi ólaunaða vinna falli á konur í meira mæli en karla?
Við viljum leggja áherslu á að tryggja að nauðsynleg úrræði séu í boði.

4. Klámvæðingin er sífellt að aukast með tilheyrandi skaðlegum afleiðingum fyrir ungt fólk. Hvernig hyggst þinn flokkur taka á þessum vanda að afloknum kosningum?
Með áframhaldandi fræðslu og forvörnum.

5. Hvaða leið teljið þið árangursríkasta til að auka þátttöku kvenna í stjórnmálum?
M.a. með fordæmum. Framsóknarflokkurinn samþykkti ný jafnréttislög á síðasta flokksþingi sínu þar sem er ákvæði um að hlutur hvors kyns í ábyrgðarstörfum fyrir flokkinn sem og á framboðslistum flokksins megi ekki vera lægri en 40%.
Fyrir nokkrum árum stóð framsóknarflokkurinn fyrir átaki til að auka þátttöku kvenna í stjórnmálum.

6. Er framboðið skilgreint sem femínískt framboð? Ef nei, hvers vegna ekki?
Við erum ekki sérstaklega auglýst sem feminískt framboð en við erum engir eftirbátar í baráttunni um að tryggja jafnrétti kynjanna í samfélaginu, þvert á móti.

7. Skiptir kyn máli? Hvers vegna eða hvers vegna ekki?
Ekki þegar mannréttindi eru annars vegar en að sjálfsögðu skiptir kyn máli þegar teknar eru ákvarðanir því þær geta haft mismunandi áhrif á kynin. Það er því nauðsynlegt að skoða stóru myndina einnig út frá kyni og stöðu kynjanna í samfélaginu í dag og oft þarf að beita sértækum aðgerðum til að ná fram markmiðinu um jafnan hlut kynjanna á öllum sviðum.

8. Hvernig hyggst þitt framboð beita sér fyrir úrlausn á dagvistunarvanda barna frá 9 - 24 mánaða aldurs?
Framsóknarflokkurinn vill að fæðingarorlofið verði lengt í 12 mánuði og huga að uppbyggingu smábarnadeilda í leikskólum til að uppfylla markmið um að innan 10 ára geti öll börn frá 12 mánaða aldri fengið inni á leikskóla.
Þangað til þetta markmið næst viljum við tryggja gjaldfrjálsan leikskóla fyrir öll börn frá 18 mánaða aldri og bæta aðgengi að þjónustu dagforeldra með því að tryggja starfsumhverfi og bæta kjör þeirra.
Þar til þetta tvennt hefur verið tryggt þá viljum við leysa vanda foreldra 9 – 18 mánaða barna, eða frá því að fæðingarorlofi lýkur og þar til leikskólinn hefst, með beingreiðslum. Slíkar greiðslur tryggja aukið val foreldra og börnum aukið öryggi í þeirri stöðu sem er uppi í dag. Frá því fæðingarorlofi foreldra lýkur við 9 mánaða aldur og þar til dvöl á leikskóla hefst við 18 til 24 mánaða aldur, búa foreldrar og börn þeirra við takmörkuð úrræði. Mikill skortur er á dagforeldrum og foreldrar á vinnumarkaði verða oft að bjarga vistun barna sinna frá degi til dags, sem er vitaskuld óásættanlegt. Með því að greiða þessum foreldrum 50 þúsund krónur á mánuði er unnt að koma til móts við þessar þarfir og brúa bilið þar til leikskólavist fæst. Valkvæðar greiðslur: Foreldrar heima með barni, afi og amma gæta barnsins eða niðurgreiðsla á þjónustu dagforeldra.

9. Telur þitt framboð þörf á að jafnrétti sé ávallt haft í fyrirrúmi í hverri kennslustund sem fram fer í grunnskólum (og öllum skólastigum) og ef svo er hvernig? Sérðu fyrir þér að þörf sé á að endurskoða námsskrá og útfærslu kennslu barna með þetta í huga?
Allir skólar þurfa að hafa jafnréttisstefnu, sem tekur til alls skólastarfsins, til að fylgja eftir í öllu starfi sínu sem og ábyrgðaraðila ( jafnréttisfulltrúa) innan veggja skólans sem sér til þess að stefnunni sé framfylgt. Það er einnig mikilvægt að allir sem starfa innan skólans fái nauðsynlega fræðslu um þessi mál.

10. Nú liggur fyrir að ein ástæða fyrir hinum mikla launamun kynjanna á Íslandi er fjöldi kvenna sem sinnir illa launuðum umönnunarstörfum. Þrátt fyrir að laun sumra þeirra hafi verið hækkuð nýlega liggur fyrir að ófaglært starfsfólk sem sinnir ræstingum o.þ.h. hlaut ekki sambærilegar hækkanir. Stór hluti þeirra sem þessum störfum gegna eru konur af erlendum uppruna. Munið þið beita ykkur fyrir hækkunum á lægst launuðu störfum, hvernig og mun verða haft til hliðsjónar að draga úr launamun kynjanna?
Launamunur kynjanna er óásættanlegur og eitt brýnasta verk samfélagsins í dag er að tryggja launajafnrétti á Íslandi. Það er til skammar hve lítils metin ummönnunarstörf eru og sama má segja um störf ófaglærðra í þeim geira. Það þarf að halda áfram að vinna að þjóðarsátt um að hækka laun þessara stétta meira en annarra til að ná fram meiri jöfnuði og réttlæti.

******************************************************************************************
Viðbótarspurning– Framsóknarflokkurinn

Framsóknarflokkurinn hyggst bjóða heimgreiðslur til foreldra með börnum á aldrinum 9 - 18 mánaða. Auglýsing sem fylgir þessu stefnumáli er með mynd af móður og barni. Að fenginni reynslu má ætla að þessi aðgerð hafi mismunandi áhrif á kynin þannig að mæður verði frekar heima en feður - sem mun bæði hafa áhrif á fjárhagslegt sjálfstæði þessara kvenna og framtíðarmöguleika á vinnumarkaði. Út frá jafnréttissjónarmiðum má líta á þessa leið sem handaflsaðgerð til að koma konum aftur inn á heimilin. Hver eru viðbrögð ykkar við því?
Það er fráleitt að þessi aðgerð sé til þess fallin að koma konum aftur inn á heimilin enda einungis um 9 mánaða tímabil að ræða. Eins og kom fram í svari við spurningu nr. 8 hér að ofan er málið tímabundin lausn á þeim vanda sem margir foreldrar barna á þessum aldri eru að glíma við í dag sem er að fá ekki dagvistun fyrir barnið sitt. Það er enn verri staða m.a. með tilliti til jafnréttissjónarmiða því með beingreiðslunum eru meiri líkur á að foreldrar sem eru báðir á vinnumarkaði geti gripið til annarra úrræða en að annað þeirra neyðist til að vera heima með barninu launalaust. Greiðslurnar eru valkvæðar og sú lausn sem hentar einum hentar ekki endilega öðrum t.d. gætu foreldrar fundið lausn á vandanum með því að ráða fjölskyldumeðlim eða “au pair” til að gæta barnsins.