Steinunn Guðnadóttir, Sjálfstæðisflokkurinn
Smelltu hér til að skoða heimasíðu Steinunnar

Steinunn Guðnadóttir fyrrverandi bæjarfulltrúi í Hafnarfirði gefur kost á sér í 6 sæti  í prófkjöri Sjálfstæðisflokksins í suðvesturkjördæmi.
Prófkjörið fer fram 11. nóvember.

Ísland í forystu - lífræn framleiðsla

Ég vil beita mér fyrir því að Ísland verði í forystu í lífrænni framleiðslu.  
Lífrænar aðferðir byggjast á því að framleiða hágæða afurðir þar sem verndun lífríkis, velferð búfjár og heilsufar neytenda er haft að leiðarljósi. 

Íslensk stjórnvöld hafa unnið að setningu viðeigandi lagareglna um framleiðslu, merkingar og eftirlit með lífrænni framleiðslu, fyrst með setningu laga og reglugerðar 1994-1995, og nú síðast með  því að innleiða reglugerð ESB.  Þau hafa hinsvegar ekki gert framkvæmdaáætlun eða markað stefnu um þróun og uppbyggingu lífrænnar framleiðslu og engin markmið hafa verið sett þar að lútandi, ólíkt því sem stjórnvöld flestra ríkja Vestur Evrópu hafa gert.

Lífræn framleiðsla lýtur eftirliti faggiltra vottunaraðila, allt frá ræktun afurða til loka pökkunar þeirra í neytendaumbúðir.  Á þann hátt er framleiðsluferill vöru tryggur og komið er í veg fyrir villandi merkingar og markaðssetningu. 

Fjármagn til lífrænnar framleiðslu hér á landi hefur verið takmarkað og ekki fullnýtt af hálfu bænda, þannig að þar virðist vanta upplýsingar og hvatningu.  Skilgreina þarf nánar í hverju lífræn aðlögun í framleiðslu felst og gera þarf ráð fyrir þremur til fimm árum í aðlögunartíma. Auka þarf fræðslu og rannsóknir um lífrænar aðferðir á Íslandi í menntakerfi landsins.   

Fjölmargar atvinnugreinar geta hagnýtt sér lífrænar og sjálfbærar aðferðir til sóknar í byggða- og markaðsþróun, þar með talin ýmsar sjávarnytjar, margvíslegur iðnaður, matreiðsla, umhverfisvernd og heilbrigðisþjónusta. Þá styðja neytendasamtök og starfsmenn í matvælagreinum lífræna þróun.

Lífræn framleiðsla hefur jafnframt jákvæð áhrif á samfélög dreifbýlishéraða.  Hún skapar atvinnu, leiðir til sparnaðar í ýmsum rekstrarþáttum, eykur áhuga á framleiðslu og þjónustu sem í boði er á svæðinu og umfram allt bætir ímynd viðkomandi svæðis í augum ferðamanna, fjárfesta og mögulegra íbúa.  

Lífræn framleiðsla styrkir hollustu íslenskra afurða og bætir ímynd Íslands.

***************

Tölvufíkn er vaxandi vandamál meðal barna og ungmenna á Íslandi

Tölvufíkn er ný uppgötvuð árátta sem tengist vaxandi tölvunotkun í nútíma þjóðfélagi. Tölvueign íslendinga er með því mesta sem gerist í heiminum og börn byrja mjög snemma að umgangast tölvur.  Því þarf að fylgjast vel með tölvunotkun þeirra og reyna að koma í veg fyrir að þau verði tölvufíklar. Mikilvægt er að hafa stjórn á notkuninni, því tölvufíkn líkist spilafíkn að því leitinu til að einstaklingar missa stjórn á hegðun sinni. 

Tölvufíkn gæti eins heitið tölvuleikjafíkn vegna þess að stærsti hluti þeirra sem ánetjast stunda tölvuleiki og spila þá oftast í gegn um netið við aðra einstaklinga.
Þessir einstaklingar geta verið félagar úr næsta umhverfi eða frá öðrum löndum og jafnvel öðrum heimsálfum. Einstaklingarnir ganga inn í mismunandi hlutverk í leiknum og leikurinn getur gengið í marga mánuði. Drengir eiga frekar á hættu að ánetjast tölvuleikjafíkn en stelpur en þó þekkist þetta hjá báðum kynjum. Einstaklingum með lágt sjálfsmat  er hættara við að ánetjast tölvufíkn.  Ekki er óalgegnt að einstaklingur með tölvufíkn eyði frá 8 uppí 16 tímum á sólarhring í tölvunotkun.  Einstaklingur í þessu ástandi vanrækir aðra hluti í lífi sínu .Eins og nám, starf og samveru með vinum og fjölskyldu.  Grunnþörfum líkamans er ekki sinnt. Einstaklingarnir sleppa svefni, hreyfingu, hollum máltíðum og þrifum. Fylgikvillar  netfíknar geta oft verið þeir sömu og hjá vímuefnaneytendum eins og sinnuleysi, félagsleg einangrun,
þunglyndi, skapofsaköst og veruleikafirring.

Foreldrar standa ráðalausir frammi fyrir þessu vaxandi vandamáli og algengt að þessa sé ekki getið í almennu forvarnarstarfi. Þegar einstaklingur er langt leiddur í tölvufíkn er erfitt að snúa honum til baka. Hann afneitar fíkninni en er í tölvunni nánast allan sólarhringinn, allt annað verður að víkja, hann fer á bak við foreldra eða nánustu aðstandendur til að komast í tölvu með öllum ráðum. Þegar hér er komið þarf einstaklingurinn á sérhæfðri meðferð að halda.  Í forvarnarskyni  er æskilegt að foreldrar stýri tölvunotkun barna sinna, þannig að börn og ungmenni sitji ekki meira en 2 klst. á dag við skjáin.  Reynslan hefur sýnt að góð líðan barna eykst með minni tölvunotkun. Mælt með því að hafa tölvurnar miðlægt á heimilinu, ekki í svefnherbergjum barnanna.  Foreldrum er jafnframt bent á að fara á heimasíðu www.saft.is þar sem leiðbeiningar eru um öruggari tölvunotkun barna.

Til að aðstoða foreldra í að bregðast við þessari vaxandi fíkn barna og ungmenna, eru þrír meginþættir nauðsynlegir: 

1. Upplýsingamiðstöð er lítur að heilbrigði barna, þar sem foreldrar fá allar upplýsingar er varða þennan vanda og önnur sambærileg málefni..
2. Stöðugt sé upplýst um forvarnir á þessu sviði.
3. Meðferðarúrræði verði fyrir hendi.