Spurningar til framboðslista

Hér fyrir neðan eru spurningar sem sendar voru til framboðslista í Reykjavík fyrir sveitarstjórnarkosningarnar 2006. Öðrum framboðum er frjálst að svara spurningunum líka og senda til okkar. Við munum gera okkar besta til að birta þau svör líka hér á vefnum í tæka tíð fyrir kosningar. Svör þurfa að berast fyrir kl. 12:00 mánudaginn 22. maí. Svör sendist á netfang Femínistafélagsins, feministinn(hjá)feministinn.is.

1. Hver er jafnréttisstefna framboðsins?
2. Hvernig mun flokkurinn beita sér fyrir því að ná fram launajafnrétti í borginni að afloknum kosningum?
3. Nú blasir við að umönnum bæði ungbarna, foreldra og veikra fjölskyldumeðlima er að færast meira yfir á heimilin sökum skorts á úrræðum í borginni. Hvernig hyggst þinn flokkur bregðast við vandanum og koma í veg fyrir að þessi ólaunaða vinna falli á konur í meira mæli en karla?
4. Klámvæðingin er sífellt að aukast með tilheyrandi skaðlegum afleiðingum fyrir ungt fólk. Hvernig hyggst þinn flokkur taka á þessum vanda að afloknum kosningum?
5. Hvaða leið teljið þið árangursríkasta til að auka þátttöku kvenna í stjórnmálum?
6. Er framboðið skilgreint sem femínískt framboð? Ef nei, hvers vegna ekki?
7. Skiptir kyn máli? Hvers vegna eða hvers vegna ekki?
8. Hvernig hyggst þitt framboð beita sér fyrir úrlausn á dagvistunarvanda barna frá 9 - 24 mánaða aldurs.
9. Telur þitt framboð þörf á að jafnrétti sé ávallt haft í fyrirrúmi í hverri kennslustund sem fram fer í grunnskólum (og öllum skólastigum) og ef svo er hvernig? Sérðu fyrir þér að þörf sé á að endurskoða námsskrá og útfærslu kennslu barna með þetta í huga?
10. Nú liggur fyrir að ein ástæða fyrir hinum mikla launamun kynjanna á Íslandi er fjöldi kvenna sem sinnir illa launuðum umönnunarstörfum. Þrátt fyrir að laun sumra þeirra hafi verið hækkuð nýlega liggur fyrir að ófaglært starfsfólk sem sinnir ræstingum o.þ.h. hlaut ekki sambærilegar hækkanir. Stór hluti þeirra sem þessum störfum gegna eru konur af erlendum uppruna. Munið þið beita ykkur fyrir hækkunum á lægst launuðu störfum, hvernig og mun verða haft til hliðsjónar að draga úr launamun kynjanna?

Viðbótarspurningar – ein fyrir hvern flokk
**************
Framsóknarflokkurinn
Framsóknarflokkurinn hyggst bjóða heimgreiðslur til foreldra með börnum á aldrinum 9 - 18 mánaða. Auglýsing sem fylgir þessu stefnumáli er með mynd af móður og barni. Að fenginni reynslu má ætla að þessi aðgerð hafi mismunandi áhrif á kynin þannig að mæður verði frekar heima en feður - sem mun bæði hafa áhrif á fjárhagslegt sjálfstæði þessara kvenna og framtíðarmöguleika á vinnumarkaði. Út frá jafnréttissjónarmiðum má líta á þessa leið sem handaflsaðgerð til að koma konum aftur inn á heimilin. Hver eru viðbrögð ykkar við því?

***************
Samfylkingin
Nú hefur í nokkur ár verið óheimilt að opna nýja nektarstaði í miðbænum. Eftir að sú samþykkt tók gildi og á meðan R-listinn hefur verið við völd hafa a.m.k. 2 slíkir staðir opnað í miðbænum. Hvers vegna hefur ekki verið gripið til aðgerða gegn þessum stöðum og munuð þið gera eitthvað í málinu ef þið haldið áfram í meirihluta borgarstjórnar?

****************
Sjálfstæðisflokkurinn
Munuð þið gera eitthvað til að fækka nektarstöðum í borginni ef þið komist í meirihluta og hversu alvarlegum augum lítið þið klámvæðinguna?

****************
Vinstrihreyfingin - grænt framboð
Í stefnuskrá ykkar kemur fram að gera á starfsfólki Reykjavíkurborgar kleift að axla ábyrgð á fjölskyldulífi. Hyggist þið grípa til einhverra aðgerða til að tryggja að niðurstaða stefnunnar verði ekki sú að konur nýti þennan rétt í mun meira mæli en karlar - sem óhjákvæmilega festir konur enn frekar í því hlutverki að bera meiri ábyrgð á uppeldi og heimilisstörfum?

*****************
Frjálslyndi flokkurinn
Á stefnuskrá ykkar kemur fram að þið viljað auka einstaklingsmiðað nám. Hafið þið skoðað hugsanleg áhrif slíkt hefur á hvort kyn fyrir sig? Hvernig munuð þið stuðla að því að einstaklingsmiðað nám auki ekki misrétti kynjanna?