Jóhanna Sigurðardóttir, Samfylkingin
Smelltu hér til að skoða heimasíðu Jóhönnu

Jóhann Sigurðardóttir þingkona býður sig fram í 2. - 3. sæti Samfylkingarinnar í Reykjavík. Prófkjör fer fram 11. nóvember.

Róttækar tillögur í jafnréttismálum
Róttækar tillögur þarf til að taka á óþolandi launamisrétti kynjanna í samfélaginu. Alþingi hefur haft nokkrar þeirra til umfjöllunar og brýnt er að þeim verði fylgt fast eftir.

Framkvæmdaáætlun til 6 ára til að ná fram fullu launajafnrétti
Á Alþingi lagði ég fram þingsályktunartillögu þar sem ríkisstjórninni var falið að undirbúa framkvæmdaáætlanir til sex ára með því markmiði að ná fram fullu launajafnrétti kynjanna í samræmi við ákvæði 14. gr. laga um jafna stöðu og jafnan rétt kvenna og karla.  Framkvæmdaáætlanirnar áttu að vera tvær, annarsvegar fyrir opinberan vinnumarkað og hinsvegar fyrir almennan vinnumarkað.  Setja átti fram tímaáætlun um aðgerðir og beita ákvæði 22. gr. jafnréttislaga um jákvæða mismunun. Jákvæð mismun er heimil samkvæmt lögum og furðulegt að ekki hafi verið lögð meiri áhersla á þessa leið. Samkvæmt jafnréttislögum  eru sérstakar tímabundnar aðgeðir sem auki möguleika kvenna á tilteknum sviðum samfélagsins ekki taldar ganga gegn jafnréttislögum, enda sé til þeirra gripið til að koma á jafnrétti og jafnri stöðu kynjanna. Ein leið sem nefnd hefur verið er að útfæra í kjarasamningum að ákveðinn hluti þeirrar heildarfjárhæðar sem varið er til kjarabóta renni sérstaklega til að jafna laun karla og kvenna.

 Ríkisstjórnin enn ekki farið að vilja Alþingis
Tillagan sem ég flutti var efnislega felld inní tillögu ríkisstjórnar um framkvæmdaáætlun í jafnréttismálum árið 2004. Stjórnvöld hafa lítið gert til að hrinda henni í framkvæmd en félagsmálaráðherra lofaði því á Alþingi fyrir stuttu að málið yrði nú tekið föstum tökum og ráðist í gerð framkvæmdaáætlanir.  Þessi viðbrögð ráðherrans komu í kjölfar niðurstöðu nýrra launakönnunar sem sýnir að ekkert hafi þokast til að ná niður kynbundnum launamun s.l. 10 ár.  Brýnt er að fylgja þessu máli fast eftir en það stendur á ríkisstjórninni að hrinda henni í framkvæmd.

Launaleynd afnumin
Ljóst er að ýmsar duldar greiðslur og fríðindi sem aldrei koma uppá yfirborðið skýra stóran hluta launamisréttis kynjanna. Því er afar brýnt að afnema launaleyndina. Það er meðal efnis í frumvarpi sem stjórnarandstaðan hefur flutt sameiginlega á Alþingi um breytingu á lögum um jafna stöðu og jafnan rétt kvenna og karla. Færa má rök fyrir því að launaleynd stangist á við jafnréttislög þar sem hún getur beinlínis stuðlað að lögbroti og þar af leiðandi fái hún ekki staðist.

Álit kærunefndar jafnréttismála verði bindandi

Annað mikilvægt ákvæði er einnig í þessu frumvarpi sem stjórnarandstaðan flytur.  Þar er lagt til að álit kærunefndar jafnréttismála verði bindandi, en eftirlitsnefnd Sameinuðu þjóðanna sem fjallar um réttindi kvenna hefur gagnrýnt að niðurstöðu kærunefndar jafnréttismála skuli ekki vera bindandi, sérstaklega þegar stjórnvöld eiga í hlut.  Margsinnis hefur kærunefnd jafnréttismála komist að niðurstöðu um að ákvæði laga um jafna stöðu og jafnan rétt kvenna og karla hafi verið brotin. Niðurstöðunum hefur þó iðulega ekki verið framfylgt þar sem álit kærunefndar er ekki bindandi.