Femínistafélag Íslands

Árið 2006 Femínistar setja lit á tilveruna
	Ljósberi ársins Gísli Hrafn Atlason, ráðskona karlahóps Femínistafélagsins var valinn Ljósberi ársins 2006. Í umsögn frá samstarfshópi Ljósbera sagði meðal annars: "Að mati samstarfshópsins hefur Gísli Hrafn sýnt frumkvæði, djörfung og baráttuanda í umræðum og verið í forsvari í því að virkja karlmenn til ábyrgðar gegn kynbundnu ofbeldi í samfélaginu."
	Frá konum til karla 16 daga átak gegn kynbundnu ofbeldi var frá 25. nóvember til 10. desember. Á fjórða tug samtaka tóku þátt árið 2006. Karlahópur Femínistafélagsins stóð fyrir málþinginu "Frá konum til karla" ásamt Stígamótum og Bríeti. Á málþingi karlahóps voru fyrirlesarar þeir Gísli Hrafn Atlason, Ágúst Ólafur Ágústsson, Ingólfur Ásgeir Jóhannesson og Þórarinn V. Hjaltason.
	Pistlar kvenna í framboði Við söfnuðum saman nokkrum stórgóðum pistlum frá konum í framboði í prófkjöri fyrir komandi alþingiskosningar.
	Stjórnmálaskóli Ungliðahópurinn stóð fyrir stjórnmálaskóla sem lukkaðist svona líka ljómandi vel. Stjórnmálaskólinn var aðeins opinn konum að þessu sinni, enda markmiðið að auka hlut kvenna í stjórnmálum. Það er þó aldrei að vita nema við höldum seinna stjórnmálaskóla fyrir bæði kyn þar sem farið er yfir jafnrétti og pólitík.
	Femínistavikan Femínistavikan var haldin með pompi og prakt 24. - 28. október. Í vikunni héldum við fund með fréttafjölmiðlum, sem eru handhafar bleiku steinanna í ár. Staðalímyndahópur opnaði heimasíðu með kynjuðum fréttum, sendar voru ályktanir til atvinnurekenda og stjórnmálamanna ásamt mörgu fleiru skemmtilegu.
	Sorgarfánar Ungliðahópurinn flaggaði sorgarfánum í Bankastræti miðvikudaginn 13. september. Hver fáni stóð fyrir ákveðnu málefni - þau eru: nauðganir, heimilisofbeldi, launamisrétti, þöggun, klámvæðing, vændi, mansal, klám, valdaleysi, staðalímyndir, ósýnileiki og strippbúllur.
Að sjálfsögðu máluðum við bæinn bleikan með öðrum félagasamtökum þann 19. júní. Við veittum einnig fréttafjölmiðlum bleika steinann þennan dag og hvöttum þá til að gæta jafnréttis í öllu sínu starfi.
	Femínistafélagið fær jafnréttisverðlaun Reykjavíkurborg veitti jafnréttisverðlaun í fyrsta sinn þann 1. maí. Femínistafélagið hlaut verðlaunin að þessu sinni og erum við að sjálfsögðu bæði ánægð og stolt með það!
Stjórnmálavefir Við settum upp nokkra vefi tengdum stjórnmálum og frambjóðendum á árinu. Við byrjuðum á að senda spurningar til frambjóðenda í prófkjöri Samfylkingarinnar fyrir sveitarstjórnarkosningar í Reykjavík. Við settum síðan upp kosningavef með svörum frá öllum flokkum fyrir sveitarstjórnarkosningarnar og söfnuðum saman pistlum kvenna í framboði fyrir komandi alþingiskosninar. Smelltu á myndirnar hér fyrir neðan til að skoða spurningar, svör og pistla.

	Úr ýmsum áttum Hittin voru á sínum stað á árinu. Við sendum frá okkur ýmsar ályktanir - sem tóku á málefnum eins og vændi, launamismun, hlut kvenna í stjórnmálum, Konukot, stuðningi við setuverkfallskonur og fleira. Við tókum líka þátt í Megrunarlausadeginum, sendum frá okkur ályktun á 1. maí og skrifuðum umsagnir.