1. maí 2003
FEMÍNISTAFÉLAG ÍSLANDS
ÞÖGGUN
Aftur á forsíðu->

30. apríl var send út fréttatilkynning á fjölmiðla með fyrsta maí ávarpi Femínistafélagsins. Fjölmiðlar sýndu femínistum engan áhuga fyrsta maí og í sjónvarpsfréttum var látið eins og þeir væru ekki til. Mörgum femínistum finnst undarlegt hvernig hægt var að taka ekki eftir femínistum, þeir voru stærsti einstaki hópurinn í Fyrsta maí göngunni, giskað er á að þeir hafi verið 300-500. Femínistar fengu ekki að flytja ávarp á fundinum, hvorki í Reykjavík né á Akranesi. Hér eru nokkur bréf sem hafa verið skrifuð til fjölmiðla eða send inn á femínistapóstlistann sem lýsa hve illa femínistar telja að fjölmiðlafólk hafi staðið á vöku sinni þennan sögulega dag.

Fréttamat
Sæl öll

Ég hitti auglýsingamann í gær og kvartaði yfir fréttamati sjónvarpsstöðvanna við hann(eins og ég geri við nánast alla sem ég hitti þessa daganna) Þá sagði hann mér að við hefðum átt að kynna okkur betur fyrir 1. maí, senda út fréttatilkynningu o.s.fr. Ég var náttúrulega alveg undrandi, hélt að fréttamenn ættu nú að koma auga á fréttnæmt efni ef því væri stillt upp fyrir framan nefið á þeim. Enn að hans sögn er það ekki svo. Fréttamenn sitja sem sagt á rassinum og bíða eftir því að einhver sendi þeim fréttatilkynningu um fréttnæmt efni. Oft er það víst þannig að auglýsingastofur(á vegum ymissa hagsmunaaðila) senda út fréttatilkynningar með uppsettum texta og myndum, tilbúið til birtingar. Og fréttamennirnir þurfa bara að senda þetta í prenntsmiðju eða að lesa fréttina inn á myndina. Ef rétt er þá er ég ekki hissa á oft skrýtnu fréttamati fjölmiðla!
Védís Guðjónsdóttir

Til blaðsins

Það var ískalt á fyrsta maí en mörg hundruð femínista létu það ekki hindra sig í að koma og taka þátt í 1. maí göngu Femínistafélags Íslands. Það voru seldir skærbleikir bolir og menn brugðu sér í þá utan yfir úlpurnar og gangan varð þannig áberandi litrík auk þess sem þáttakendur voru áberandi ungir, karlar og konur með lítil börn og stór, mörg hundruð manns. Það lá alveg ljóst fyrir að hér er sterkt pólitískt afl komið fram. Er þetta ekki frétt? Af hverju láta bæði blöðin og sjónvarpið eins og ekkert hafi gerst? Voru allar myndavélar settar niður í tösku þegar kom að femínistunum? Ástæðan fyrir óánægju okkar er ekki sú að okkur langi svo til að sjá myndir af okkur. Sagan er hins vegar skráð af fjölmiðlunum og ef þeir þegja um atburðina "hafa þeir ekki gerst" eins og þar stendur. Femínistafélag Íslands sýndi mikið fylgi og styrk á 1. maí og það er hrein sögufölsun ef menn láta eins og eitthvað annað hafi verið tilfellið og stinga þessari frétt undir stól.

Dagný Kristjánsdóttir

Ekki hissa
2 May 2003

Sæl femínistar
Þó ég hafi reynt að skrá mig af listanum fyrr í kvöld vegna þess að ég er að drukkna í umræðu fæ ég skeytin enn inní pósthólfið mitt. Ég sá því athugasemdirnar um undrunina yfir áhugaleysinu um feministagönguna og ég stenst það ekki að taka pínulítinn þátt í umræðunni.
Ég er ekki hissa. Ég á bara eitt orð. Ég er ,,hundleið" á fréttum og matreiðslu fréttafólks á því sem skiptir máli í lífinu . Ég nefni fréttastofu Sjónvarpsins, t.d. kosningaþættina sem fréttastofan virðist svo stolt af. Endalaus hefðbundin viðtöl við þessa endalausu og hefðbundnu karla í þessum endalaust hefðbundnu karlastörfum sem eiga að upplýsa okkur áhorfendur um hvernig landið liggur í pólitíkinni og hversdagslífinu! Ég skil ekki að geti átt sér stað í dag! Undantekningarnar eru sorglega fáar en ég vil þó þakka Bergljótu Baldursdóttur fyrir það þegar hún ræddi við konurnar um ungu bankastjórastrákana fyrir stuttu.
,,Fréttamat" er eitthvað sem okkur almenningi er talin trú um að við getum ekki véfengt enda vilja fréttamenn meina að það sé eingöngu á færi þeirra sem hafa ,,fréttanef" að segja til um hvað eigi erindi við okkur hin. En þetta er náttúrulega ekki annað en yfirborðssniff þegar fólk finnur ekki lyktina af því sem gerist undir niðri og skiptir höfuðmáli. Mér finnst það segja allt um óendanlega hefðbundið fréttamat hefðbundna fréttanefsins þegar fréttastofurnar láta eins og það sé engin femínismabylgja!
Áslaug Thorlacius

Þöggun

Komiði sæl og takk fyrir góða göngu,
Ég giska á þöggun frekar fram yfir allt annað. Ástæðan er sú að við í Bríet, félagi ungra feminista, kynntum okkur ekki fyrir 1.maí gönguna í fyrra en fengum samt smá umfjöllun. Fréttakonan frá stöð 2 (ég man ekki hvað hún heitir, gæti verið Berglind?) kom einfaldlega til okkar og tók viðtal, sjálfsagt vegna þess að hún hefur áhuga feminískum málefnum. Mín ágiskun er sú að þeir fréttamenn sem voru á vaktinni 1.mai hafi einfaldlega ekki haft áhuga á Feministafélaginu og þar af leiðandi ekki fjallað um það.

Ekki það að öflug kynning sé ekki alltaf af hinu góða!

Ósýnilega bleika höndin

Ósýnileg bleik hönd með uppþvottabursta og sápul
Salvör Gissurardóttir póstaði á póstlistann 5. maí.

DV tók eftir bleika litnum

Langaði líka að benda ykkur á að inn á heimasíðu DV kom þessi mynd og frétt
1. maí um femínista:http://www.dv.is/frettir.php?id=1810
Segið svo ekki að enginn fjölmiðill hafi ekki tekið eftir bleika
litnum.....

Með bestu kveðjum
Snæfríður Ingadóttir,
blaðamaður á DV

Bleika flóðið sem rann niður Njarðargötuna

Sæl öll.

Ég fór í gönguna í dag, og mikið var gaman að sjá bleika flóðið renna niður
Njarðargötuna. Til hamingju með það!
Svo settist ég niður fyrir framan fréttirnar bæði á stöð tvö og
ríkissjónvarpinu og ég tel að upptökumenn(eða klipparar) hljóti að hafa lagt
sig í framkróka við að komast hjá því að sýna svo mikið sem einn bleikan
bol. Miðað við þann fjölda af bleikum bolum sem voru í gönguni finnst mér
með ólíkindum að enginn þeirra hafi fest á filmu.
Védís Guðjónsdóttir.

Bleika skottið sem sást ekki

1.maí

Komið þið öll blessuð,

mikið var gaman í göngunni í dag, og ekki síst að vera með í þessu öfluga
bleika skotti, svona líka fullu af fyrirheitum og fjöri. Það virtist svona
úr fjarlægð vera bara stór hluti göngunnar. Síðan var mjög skemmtileg og
vekjandi dagskrá í Þjóðleikhúskjallaranum sem hitaði um hjartarætur. Bestu
þakkir.

Nema hvað, þegar kona settist spennt fyrir framan skjáinn og horfði á
fleiri stöðvar en vanalega til að sjá hve fréttafólk hefði verið með
fingurna á púlsinum og tekið eftir því sem koma skal, var biðin og bara
biðin ein eftir þessu merkilega fyrirbæri á þessum fyrsta maí.

Ég hringdi í Stöð 2 og talaði við Ólöfu Rún Skúladóttur og lýsti undrun
minni yfir þessu fréttamati en fékk svör um eina upptökuvél sem erfitt var
að bera og því sýnt frá Hallgrímskirkju og Ingólfstorgi. Ég taldi það hafa
verið mikla yfirvegun að sjá ekki eða sýna einn bleikan bol og þeirra
mistök að finna ekki hvernig vindurinn blæs.

Við þurfum að bregðast við þessu með sterkum og uppbyggilegum hætti. Þetta
er nú meiri sofandahátturinn og rænuleysið. Ég held varla að það sé verið
að látast ekki sjá. Til þess er andvaraleysið of mikið.

En bregðumst við. Annars bara bestu þakkir til ykkar allra sem lögðuð hönd
á plóg til að gera daginn gleðilegan.

Kær kveðja,
Guðrún Agnars

Aðrar leiðir til að koma boðskap
til skila en 1-2 sekúndur í sjónvarpi

2.maí

Mér persónulega finnst ekki neitt skrýtið við það þótt að flestir myndir sem fréttastofurnar birtust hafi verið af fólkinu frá ASÍ og Eflingu þar sem þetta var nú 1.maí gangan. Og vorum við ekki með glæsilegan fulltrúa í Kastljósinu daginn áður? En auðvitað hefði verið gaman að sjá bleiku bolina í sjónvarpinu. Ég held samt að við eigum ekkert að vera að æsa okkur yfir þessu, það eru aðrar leiðir til að koma boðskap okkar til skila heldur en að sjást í 1-2 sekúndur í sjónvarpinu.
Egill Ólafsson

Þöggun

2.maí
Mér leið alveg eins og þér Védís!
Sérstaklega þar sem ég sá tökumenn taka myndir af okkur.
Ekki minnst á hve mikinn "lit" við settum á gönguna. Hefði ekki þurft meiri umfjöllun en það. Líka auðvelt myndatökuefni þar sem við vorum að mestu saman en ekki hér og þar. Þetta kallast þöggun á fræðimáli. Og henni er greinilega beitt ennþá.

Kristín Ólafsdóttir

Látum ekki bjóða okkur þetta

2.maí
Feministar.

Látum ekki bjóða okkur þetta, sendum athugasemdir á rúv, stöð 2 og
fréttablaðið.

elinh@ruv.is - Elín Hirst, fréttastjóri
karl.gardarsson@nlc.is - Karl Garðarsson, fréttastjóri
ritstjorn@frettabladid.is - Fréttablaðið
bestu kveðjur,

Sóley feministi sem kveikti rosa spennt á sjónvarpinu í gærkvöldi og bjóst við bleikri slikju yfir öllum fréttaflutningi sem reyndist svo vera hundleiðinlegur eins og endranær og alls ekkert bleikur :o(

Þetta versnar

2.maí

þetta versnar, Fréttablaðið minnist á marga í göngunni, m.a. herstöðvarandstæðinga....sem ég held að hafi ekki verið mjög margir, en
ekkert á okkur....ég er spæld...

kv. Hrafnhildur Ragnarsdóttir