Femínistafélag Íslands var stofnað þann 14. mars 2003 og telur nú nálægt 500 félagsmenn. Félaginu hefur á örskömmum tíma tekist að rjúfa þá kyrrstöðu sem einkennt hefur jafnréttismál og umræðu um þau í íslensku samfélagi síðastliðin ár. Í tilefni 1. maí, frídegi verkafólks, skorar Femínistafélagið á íslensk stjórnvöld, forystu atvinnulífsins og hagsmunasamtök launafólks að gera sérstaka framkvæmdaáætlun um aðgerðir til að vinna gegn kynbundnum launamun í íslensku samfélagi. Atvinnutekjur kvenna eru aðeins 57% af atvinnutekjum karla og hinn svokallaði leiðrétti launamunur kynjanna mælist um 16%.

Ljóst er að stóraukin menntun kvenna og um 80% atvinnuþátttaka þeirra hefur ekki skilað sér í jafnri stöðu kynjanna á íslenskum vinnumarkaði. Atvinnuþátttaka kvenna á Íslandi er sú mesta í hinum vestræna heimi og vinnudagur þeirra einnig lengstur. Vinnuframlag kvenna hefur skipt sköpum fyrir aukna þjóðarframleiðslu og vaxandi hagvöxt á Íslandi undanfarna áratugi. Femínistafélagið vill að konur njóti vinnu sinnar til jafns við karlmenn í launum og stöðuveitingum. Konur eru sárafáar í stjórnunarstörfum á vinnumarkaði og einungis 18,7% forstöðumanna ráðuneyta og undirstofnana þeirra. Þá eru konur ósýnilegar í forystu atvinnulífsins og í stjórn verkalýðsfélaganna.

Snúum blaðinu við, vinnum að þjóðarsátt um jafnrétti kynjanna.

Femínistafélag Íslands