Bleikir steinar
Morgunverðarfundur 31. október 2003
Á forsíðu->

HANDHAFAR BLEIKU STEINANNA - JAFNRÉTTIÐ Í KIRKJUNNI, HJÁ REYKJAVÍKURBORG OG Í HEILBRIGÐISKERFINU.

Föstudagsmorguninn 31. okt. verður haldinn morgunverðarfundur kl. 8.15 - 9.30 á Grand Hótel um jafnrétti kynjanna í kirkjunni, hjá Reykjavíkurborg og í heilbrigðiskerfinu. Fundurinn er liður í feministavikunni sem nú stendur yfir á vegum Feministafélags Íslands. Gestir fundarins verða Jón Kristjánsson heilbrigðisráðherra, Þórólfur Árnason borgarstjóri og séra Sigrún Óskarsdóttir formaður jafnréttisnefndar kirkjunnar. Fundarstjóriverður Kristín Ástgeirsdóttir sagnfræðingur. Allir eru velkomnir.

Þann 19. júní síðast liðinn - þegar minnst var kosningaréttar kvenna - afhentu félagar úr Feministafélagi Íslands nokkrum ráðamönnum þjóðarinnar bleika steina til að minna á jafnrétti kynjanna en bleiki liturinn er litur félagsins. Á föstudaginn verður steinunum fylgt eftir og kannað hvar jafnréttið er statt innan þriggja stórra þjóðfélagsstofnana. Þær eru: Reykjavíkurborg sem er einn stærsti vinnuveitandi landsins og annast
þjónustu og stofnanir sem snerta daglegt líf allra borgarbúa, svo sem grunnskólana, félagsþjónustuna o.fl., þjóðkirkjan sem hefur mótað trúarlíf og menningu okkar í meira en 1000 ár og loks heilbrigðiskerfið sem einniger mjög stór vinnuveitandi og hefur mikil áhrif á líf fjölskyldnanna í landinu með þjónustu sinni. Hjá öllum þessum stofnunum vinnur mikill fjöldi kvenna en hver eru áhrif þeirra? Hvernig er staða kvenna innan borgar, kirkju og heilbrigðiskerfis og hvar eru konurnar í æðstu stöðum? Hvernig er unnið að jafnrétti kynjanna og tekur starf og stefnumótun mið af konum og jafnréttissjónarmiðum? Fulltrúar þriggja ólíkra en mjög áhrifamikilla stofnana þjóðfélagsins hittast á óvenjulegum fundi til skrafs og ráðgerða með feministum.

F.h. Feministafélags Íslands.
Kristín Ástgeirsdóttir

Síðast uppfært 29-oct-03 af SG.