Ég kaupi konur
FEMÍNISTAFÉLAG ÍSLANDS

Fréttatilkynning frá Femínistafélagi Íslands

Laugardaginn 28. júní, kl. 22:00, mun ofbeldisvarnarhópur Femínistafélags Íslands selja barmmerki fyrir utan nektardansstaðinn Goldfinger í Kópavogi. Merkin eru bleik að lit og á þeim stendur: Ég kaupi konur.Tilgangurinn með þessu er að vekja neytendur kynlífsiðnaðarins til umhugsunar um hlutverk sitt innan iðnaðarins þar sem þeir mynda eftirspurn eftir kvenlíkömum.

Umfang og eðli kynlífsiðnaðarins er orðið eitt helsta áhyggjuefni yfirvalda um allan heim. Iðnaðurinn veltir gríðarlegum fjárupphæðum, álíka og vopna- og eiturlyfjaiðnaðurinn. Samkvæmt áætlunum Sameinuðu þjóðanna eru um 4 milljónir manns seldar mansali á milli svæða og ríkja um allan heim á ári hverju.

Stærsti hópurinn eru konur og börn sem eru seld til þess að ?starfa? innan klám- og vændisiðnaðarins með tilheyrandi mannréttindabrotum og ofbeldi.Um 500.000 konur eru seldar mansali til vestur Evrópu á hverju ári þar sem karlar kaupa ?þjónustu? þeirra. Grunnforsenda þessa iðnaðar er því eftirspurn kúnnanna (karla) sem virðist vera óseðjandi. Hér á Íslandi hefur vændi þrifist á nektardansstöðunum (skv. Vændisskýrslu dómsmálaráðuneytisins 2001) þar sem líkamar erlendra og íslenskra kvenna ganga kaupum og sölum.

Við hvetjum fjölmiðla til að sýna uppátækinu athygli og stuðla þannig að nauðsynlegri umræðu um stöðu kynjanna innan kynlífsiðnaðarins.

Nánari upplýsingar veitir Hildur Fjóla Antonsdóttir, sími 6980895.

Ofbeldisvarnarhópur Femínistafélags Íslands

Sett á vefsíðu 28-jun-03 - Salvör
Aftur á forsíðu->