Bleikir steinar 19. júní
FEMÍNISTAFÉLAG ÍSLANDS

Myndin frá kirkjan.is þegar Kristín og Erla afhentu biskupi bleikan stein

Kristín Ólafsdóttir og Erla Hlynsdóttir afhentu ráðamönnum bleiku steina 19. júní. Þær skrifuðu þessa frásögn:

Þann 19. júní síðastliðinn, á kvenréttindadaginn, afhenti Femínistafélag Íslands bleiku steinana í fyrsta skipti. Slagorð dagsins var “Styðjum jafnrétti – málum bæinn bleikan”. Við vildum mála bæinn bleikan í eiginlegri og óeiginlegri merkingu og málaðir bleikir steinar varð niðurstaðan eftir töluvert hugarflug . Bleiku steinarnir eiga að minna viðtakendur á að hafa jafnréttissjónarmið að leiðarljósi við ákvarðanatöku og hvetja þá til að kynna sér femínisma. Bleiku steinarnir voru settir á viðarplatta og á þeim var skjöldur sem á stóð: „19. júní 2003. Með kveðju frá Femínistafélagi Íslands”. Þeim fylgdi innrammað skjal um tilganginn.

Þeir ráðamenn sem áttu að vera þess heiðurs aðnjótandi að fá slíka steina voru Ólafur Ragnar Grímsson forseti Íslands, Davíð Oddsson forsætisráðherra, Karl Sigurbjörnsson biskup Íslands og Þórólfur Árnason borgarstjóri Reykjavíkur.
Haft var samband við skrifstofur og aðstoðarfólk þessara manna, Femínistafélag Íslands kynnt lauslega, sagt frá ætlaðri afhendingu steinanna og sú spurning borin upp hvort að viðkomandi ráðamaður vildi taka við slíkum steini á sjálfan kvenréttindadaginn.

Strax kom í ljós að forsetinn yrði erlendis á þessum tíma þannig að ákveðið var að tekið yrði við steininum fyrir hönd hans á skrifstofu forseta. Karl Sigurbjörnsson tók persónulega við erindi félagsins í gegnum síma og tók hann vel í það. Það var hægara sagt en gert að fá uppgefið á hvaða tíma borgarstjóri yrði laus þennan dag en alveg frá byrjun var það fastlega gefið í skyn að hann myndi taka við steininum, sem hann og gerði. Einnig var haft samband við aðstoðarmann Davíðs Oddssonar. Hann sagði Davíð vera mjög upptekinn mann og fékk að hafa samband síðar til að svara erindinu. Svörin sem fengust voru á þá leið að forsætisráðherra væri svo upptekinn þennan dag að hann sæi sér ekki fært að taka við steininum. Skilaboðin frá honum voru þau að honum finndist upplagt að hafa samband við félagsmálaráðherra þar sem jafnréttismál snertu hann beint. Það var reynt en þar sem sá ráðherra var í sumarfríi var afráðið að athuga viðbrögð heilbrigðisráðherra, Jóns Kristjánssonar, enda skiptir kynferði töluverðu máli í málefnum þess ráðuneytis. Það tók innan við 5 mínútur að fá svörin þar á bæ sem voru að það væri honum sönn ánægja að taka við bleikum steini frá Femínistafélagi Íslands.

Fyrsta afhendingin fór fram kl. 10:40 hjá heilbrigðisráðherra. Ráðherrann var í fölbleikri skyrtu og aðstoðarkona hans var einnig klædd í bleikt. Eftir afhendinguna ræddum við stuttlega um Femínistafélagið og hvernig jafnréttismál koma við sögu hjá ráðuneytinu. Kl. 11:00 lá leiðin á skrifstofu forsetans en þar sem hann var fjarstaddur tók ritari hans við steininum og setti á skrifborð forsetans svo bleiki steinninn væri það fyrsta sem blasti við forsetanum þegar hann kæmi aftur.

Biskupinn veitti bleika steininum viðtöku kl. 12:00 og var hann í fjólubleikri skyrtu. Hann og helstu ráðgjafar embættisins gáfu sér góðan tíma að ræða við fulltrúa Femínistafélagsins, m.a. um þau mál sem við berjumst sameiginlega gegn, s.s. klámvæðingu og lítilsvirðingu kvenna.

Síðastur í röðinni var borgarstjórinn en hann veitti steininum viðtöku kl. 13:45, rétt áður en borgarstjórnarfundur hófst og því lítill tími til spjalls auk þess sem fjölmiðlar vildu hafa tal af honum við þetta tækifæri. Áberandi var að starfsfólk Ráðhússins, jafnt sem borgarfulltrúar á leið á borgarstjórnarfund, klæddust bleiku og/eða báru eitthvað bleikt. Stefán Jón Hafstein var með bleika flugu sem hann hafði hnýtt af þessu tilefni.

Stefnt er að því að afhending bleiku steinanna verði árlegur viðburður.

Afhending bleiku steinanna vakti athygli fjölmiðla, var bæði í hádegisfréttum á Rás I og í sjónvarpsfréttum RÚV um kvöldið. Kristín Ólafsdóttir var svo viðmælandi í Kastljósinu um kvöldið. Hún var í bleikum bol.

Sett á vef 1-jul-03- Salvör Gissurardóttir
Á forsíðu vefs Femínistafélags Íslands